MeraugisF.txt

#META#  TextURI          :: MeraugisF
#META#  DEAF             :: http://www.deaf-page.de/bibl/bib99m.php#MeraugisF
#META#  TL               :: 
#META#  FEW        	
#META#  ARLIMA           :: https://www.arlima.net/qt/raoul_de_houdenc.htmll#mer
#META#  Author           :: Raoul de Houdenc
#META#  AuthorBorn        
#META#	AuthorBornAmb	  
#META#  AuthorDied      
#META#	AuthorDiedAmb	  
#META#	AuthorFl1	      
#META#	AuthorFl2	      
#META#  TextTitle        :: Meraugin de Portlesguez
#META#  TextSubtitle  
#META#  TextVols         :: 
#META#  TextSubj         :: 
#META#	TextDom          :: 
#META#	Translation      :: 
#META#	Collection       ::
#META#	CollectionNo	  
#META#  TextDescARL      :: Vers octosyllabiques à rimes plates
#META#  TextDescVers     :: 8
#META#  TextDateARL      :: Entre 1225 et 1235
#META#  TextDateAdj      :: 13
#META#	TextDateMin	     :: 1225
#META#	TextDateMax	     :: 1235
#META#  EdEditor         :: Friedwagner, Mathias 
#META#  EdPlace          :: Halle
#META#  EdPublisher      :: Niemeyer
#META#  EdVol            :: 
#META#  EdYear           :: 1897
#META#  EdPages          :: 1-227
#META#  MsBase           :: Vat. Reg. lat. 1725 
#META#  MsOther          :: Wien Österreichische Nationalbibliothek 2599
#META#  MsOther          :: Torino Bibl. naz. L.IV.33
#META#  MsOther          :: Kraków Univ. gall. qu. 48 
#META#  MsOther          :: BN nfr. 5386 
#META#  MsNum            :: 5
#META#	MsDateARL        :: 
#META#	MsDateAdj        :: 
#META#	Form             :: v
#META#	Complete         :: true
#META#	NoWords          :: 
#META#	NoLines          :: 5938
#META#	DialAuth      
#META#	DialScribe    
#META#  ScanURL          :: https://archive.org/details/raoulvonhoudenc00friegoog/
#META#  ScanURIOther  
#META#  ArkID            :: ark:/13960/t2g73fj2r
#META#  LccnID          
#META#  OclcID          
#META#  WebAuthor        :: 
#META#  ORCIDWebAuthor   :: 
#META#  WebReviewer      :: 
#META#  ORCIDReviewer    :: 
#META#  MiscInfo        
#META#  CCLicense        :: CC BY-NC-SA 4.0 International


Page003
Qui de rimoiier s'entremet
Et son cuer et s'entente met,
Ne vaut noient quan que il conte
S'il ne met s'estude en cel conte
Qui toz jorz soit bons a retrere;
Car joie est de bone oevre fere
De matire qui toz jorz dure:
C'est des bons contes l'aventure
De conter a bon conteor.
Cil autre qui sont rimeor
De servantois, sachiez que font:
Noient dïent, qu'a noient vont
Lor estude et lor mot qu'il dïent.
Contrediseor sont, ne dïent
Point de lor sens, ainz sont de ceus
Qui tot boivent lor sens par eus.
Por ce RAOUS DE HODENC dit
Qu'il veut de son sens qui est petit
Un novel conte comencier
Qui sera bons a anoncier
Toz jorz, ne ja mes ne morra;
Mes tant com cist siecles durra,
Durra cist contes en grant pris.
C'est li contes de Meraugis
Qui fist les fez que je racont;
Mes s'au conter ne vos mescont,
Page004
Il n'i a mot de vilainie,
Ainz est contes de cortoisie
Et de beaus moz et de plesanz.
Nus, s'il n'est cortois et vaillanz,
N'est dignes dou conte escouter
Dont je vos vueil les moz conter.
folio98d
Seignor, au tens le roi Artu
Qui tant estoit de grant vertu
Ot en Bretaigne la Greignor
Un roi qui tint mout grant honor.
Ce fu li rois de Cavalon
Qui fu plus beaus que Absalon,
Si com tesmoigne li Greaus.
Li rois qui fu preuz et loiaus
Et riches d'amis et puissanz,
Une fille ot qui fu vaillanz.
La damoisele ot non Lidoine:
N'ot jusqu'au port de Macedoine
Feme qui fust de sa beauté,
Ainz fust autre jovenz viuté
Qui fust demostrez lez sa face.
Por ce me plest que je en face
De li beles descriptïons:
Ce fu li plus gentiz cïons
Ou Deus meïst onques nature;
De deviser tel creature
Me dot que je n'en viegne a chief:
Car la pucele avoit le chief
Page005
De bele assise, et li chevuel
Plus sor que penes d'oriuel;
Le front ot haut, cler et bien fet,
Et si ne furent point mesfet
Li sorcil qui estoient brun,
Ainz estoient si bel chascun
Com s'il fussent de main portret,
Si estoient contremont tret
Par reson, et larget entrueil.
Li oeil, se je mentir n'en vueil,
Furent de si sotil esgart
Que la more de son regart
Passast bien parmi .V. escuz
Et rendist matez et vaincuz
Le cuer qui fust dedenz le ventre.
Dou regart d'oeil qui einsi entre
Vos di qu'il s'en fet bon garder:
Nus ne la peüst esgarder
Qui ne fust alumez de li.
Por ce que tant loer l'oï
folio99a
Vueil raconter une merveille:
Ele ot plus fresche et plus vermeille
La face que rose de pré;
Mout ot beau sens et atrempé
Page006
Qui compassa tel creature.
Si grant largece i mist nature
Qu'onques greignor ne fist a droit:
Ele ot le nes tretiz et droit
Et bele boche et cleres denz;
Quant la langue parloit dedenz,
Li dent resembloient d'argent;
Et por mieuz deçoivre la gent
Ot une gorge esperital,
Plus blanche que noif ne cristal;
Le col ot lonc et blanc et droit.
Se je la veoie orendroit
Apertement devant mes ieuz,
Je ne porroie mie mieuz
La beauté de li deviser.
Nus ne la peüst aviser
De ses ieuz, qui tant l'avisast,
Que ja mes mieuz la devisast
Fors moi tot sol qui la devis.
S'ele fu bien fete de vis
Et plesanz a tote la gent,
Si ot ele le cors plus gent
Que n'ot Lorete de Brebraz.
Beles espaules et beaus braz
Ot la pucele et beles mains
Qui ne coroient pas dou mains
Por doner quant lieus en estoit.
Page007
La damoisele qui estoit
Si plaine de totes bontez,
Qui une foiz fust acolez
De ses braz qui tant erent blanc
Ja mes n'eüst la gote el flanc.
S'en la damoisele ot beauté,
Plus i ot sens et plus bonté;
Qu'ele fu dou tot si cortoise
Qu'environ li a une toise
N'avoit se cortoisie non.
Pucele estoit de grant renon
Et escole de bien aprendre.
Environ li peüst l'en prendre
Totes les honors a plain poing,
Et les puceles de mout loing,
folio99b
De Cornoaille et d'Engleterre,
La venoient par non requerre
Por veoir et oïr parler.
Toz li monz i soloit aler
A si cortois pelerinage;
Car la pucele estoit si sage
Que ja si cortois n'i parlast
Qui plus cortois ne s'en alast
S'il vousist ses diz retenir.
A cel tens la sieut l'en tenir
Por la plus gentil damoisele.
Page008
S'ele ert gentiz et preuz et bele,
Parmi tot ce fu el si digne;
Car qui de li veoir se digne,
Ja le jor ne li mescheïst,
Non, par mon chief! nes s'il cheïst
D'autresi haut com un clochier;
Ja por ce n'esteüst clochier
Puis qu'il l'eüst le jor veüe.
Toz li monz savoit a veüe
Qu'ele avoit si grant digneté.
A la pucele, en verité,
Avint que ses pere fu morz.
Ce ne li fu mie deporz:
Qu'a poi que ne s'en despera
Sans ce que point ne s'empira
Dou bien ou estoit ses pensez.
Quant ses pere fu trespassez,
Si tint la terre, et ce fu voirs;
Que ses pere n'avoit plus d'oirs
Que li, cui sa terre escheï.
Et je vos di qu'il li cheï
Einsi bien de tenir sa terre
Qu'onques ne la semonst de guerre
Page009
Ne cist ne ceste ne nului.
Einsi tint terre sanz anui.
Quant ele l'ot .III. anz tenue,
Ele se fu si maintenue
Que toz li mondes l'en loa,
Et tant que ses cuers li loa
Qu'ele alast devant Lindesores
Ou la dame de Landemores
Avoit fet .I. tornoi crïer
Ou ele fera escrïer
Mainte enseigne et maint cop ferir:
Cui l'onor porra avenir
folio99c
De vaintre le tornoiement,
Si en portera quitement
Un cisne qui el pin sera,
Et si vos di qu'il besera
La pucele de Landemore
Qui n'est mie lede ne more.
Quant li cisnes sera donez,
Maintenant iert .I. cors sonez
A la fontaine soz le pin:
Sus une lance de sapin
Sera uns esperviers muëz
Qui ja n'iert pris ne remuëz
Devant la que cele le preigne
Qui par veüe lor apreigne
Qu'ele soit plus bele que totes;
Se la robe ert perciee as cotes,
Page010
Por tant que ce fust la plus bele,
N'i avra il ja damoisele
Qui ait l'espervier se li non;
Car il sera donez par non
A cele qui iert esleüe
D'estre la plus bele a veüe.
Einsi fu lors li tornois pris.
Li bacheler d'amor espris
L'amainent chascuns s'amie.
Li tornois ne remaindra mie;
Que tuit li errant bacheler
De Logres i voudront aler
Au tornoi por le pris conquerre.
Et Lidoine si a fet querre
Bien jusqu'a .XXX. damoiseles,
Les plus gentiz et les plus beles
Qu'el puist trover en sa contree.
Por ce que cuide estre encontree
Les fist richement atorner.
Ne mist pas terme au retorner,
Mes au movoir les fist vestir
Des plus riches pailes de Tir
Qu'en peüst trover por argent.
La damoisele fist sa gent
Et totes les dames monter:
Ne sai pas toz ceus aconter
Page011
Qui le jor en sa rote murent;
Mes tant chevauchent qu'eles furent
Es plaines devant Lindesores,
Et li tornoiemenz fu lores
folio99d
Toz prez come de l'assembler.
Eles comencent a ambler,
Si virent pres d'un estandart
.I. hiraut qui tenoit un dart
En sa main, mout trenchant d'acier.
Sa lecherie ert de lancier
La ou li tornois assembloit,
Mes tant estoit lez qu'il sembleoit
Qu'il fust ovrez a besaguë;
Qu'il avoit beslonge et aguë
La teste et tot le cors mal fet.
Mes ja par moi n'iert plus retret
Ses cors ou Deus n'avoit que fere;
Que je ne porroie desfere
La grant hidor que il avoit.
Il se regarde arrier, si voit
Les dames qui vindrent amblant;
Ses conut, mes n'en fist semblant
Qu'il les veïst, ainçois s'en cort
A la dame qui tint la cort,
Qui estoit sor une bretesche.
Page012
N'a mie fete longue tresche,
La l'a trovee et si li dit:
"Dame", fet il, "sanz contredit
Sachiez que la dame est venue
A cui l'onor est avenue
De l'espervier quitement prendre."
"Ice", fist ele, "vueil aprendre
Qui ele est donc qui si est bele."
"Dame", fet il, "c'est la pucele
Fille le roi de Cavalon."
Dist la dame: "Done avalon
Contre li jus de l'eschafaut."
Lidoine, sor cui riens ne faut
Qui a bone oevre soit contee,
A soz l'eschafaut encontree
La dame qui le tornoi tint,
Qui la salua et retint
Et li dist: "Dame, bien veigniez!
Et si vos pri que vos preigniez
Ceste bretesche qui est ci."
"Dame, la vostre grant merci"
Ce dist Lidoine qui fu sage,
"Je retieng volontiers l'estage
Par covent que vos i vendrez;
Sel retieng et vos le prendrez
Comunaument puis qu'il est nostre.









Page063
folio107b
Plorent et vont criant aprés:
"Va t'en sanz revenir ja mes!"
Et cele qui s'en vet amblant
Escoute, mes n'en fet semblant
Que de lor dueil a riens li soit.
Li chevaliers de ce qu'il voit
S'esmerveille et ne set que dire
Fors tant qu'il dit par mout grant ire:
"Deus, tant m'en poise! C'est par moi
Que cil dieus est, ne je ne voi
Par quoi j'en puisse oïr noveles.
Ha!" fet il as .II. damoiseles
Qui remainent, "dames, merci!
Ainçois que me parte de ci,
Car me dites se vos savez
Dont cist dieus est que vos avez,
Par si que je vos covenanz,
Coment que li meschiés soit granz,
Se c'est que jel puisse amender,
Que j'en ferai sanz demorer
Tot mon pooir outreement;
Car mout me poise durement
De vostre dueil, si n'en puis mes."
Et celes respondent aprés:
"Danz chevaliers, c'est chose outree
Que ja par vos n'iert amendee,
Non por pooir que vos aiiez.
Page064
Mes d'itant ne vos esmaiiez
Se vostre dame un petit plore
Por nos; encor vendra une hore
Qu'ele plorra, mes c'iert por vos.
Li dieus qui or li muet por nos
Li atornera autrement;
Car ci n'a fors comencement
De plorer, si ploron einsi
Ele por nos et nos por li."
Li chevaliers s'est corrociez
Et dit: "Or sui je maneciez,
Si ne sai de cui ne por quoi.
Hui mes ne me tendrai je coi,
Car coardie sembleroit."
L'escu qui au fresne pendoit
Reprent as mains, sel giete loing
Et dit: "Dames, .I. don vos doing
Que je gerrai ceenz a nuit,
Cui qu'en poist, mes qu'a vos n'anuit.
folio107c
Lors si verrez qu'en avendra
Sempres quant mes hostes vendra."
Et celes respondent: "Beaus sire,
Pas ne vos volon escondire
L'ostel itel com nos l'avon.
Sanz ce ja gré ne vos savron
De l'aler ne dou remanoir,
Page065
Ne nos n'en volon gré avoir.
Se maus ou biens vos en venoit,
Ne dites pas que par nos soit!"
"Non ferai je, je n'en quier plus
Que vostre gré!" Lors descent jus
Et dit: "Ceenz est mes hosteus.
Ci verrai je qui sera teus
Qui le me vueille contredire!"
"Avoi!" fet Lidoine, "beaus sire,
Tenez nos pes!" - "Si faz je, dame."
A tant s'assiet et dit: "Par m'ame,
Coment que li jaainz ait non,
Je ne demant se guerre non."
El tref remest la nuit einsi
Li chevaliers, mout l'ont servi
Les .II. dames a lor pooir;
De quan qu'eles porent avoir
L'onorerent, mes si avint
Qu'onques la nuit au tref ne vint
Chevaliers nus de nule part.
Et lors, quant la nuit se depart,
Se puet Meraugis merveillier.
Si fet il plus qu'il ne fist hier
Et dit, quant au tref ne vient nus,
Que ci ne guetera il plus.
Au cheval vient, s'i met la sele,
Quant montee ot la damoisele,
Page066
As dames vient et prent congié
Et dit: "Dames, or ne sai gié
Que dire quant nus ne repere
A cest tref. Je n'en puis plus fere,
Ainz m'en vois, et sachiez de voir
Que vostre sui a mon pooir
Par toz les lieus ou je porroie.
Mes encore vos proieroie
Que me deïssiez verité
Por quoi cist dieus a ci esté,
Et qui est sire de çaienz."
Celes respondent: "C'est noienz,
folio107d
Ja plus ne vos en diron ore;
Vos le savrez assez encore."
Et quant li chevaliers l'entent,
"A Deu!" fet il, plus n'i atent,
Lors s'en vet et s'amie o lui.
Einsi chevauchent ambedui
Par mi la grant forest oscure
Tant qu'a .I. gué par aventure
Ont .I. chevalier encontré
Qui vet disant: "Ohé!" - "Ohé?" -
Voire, si vos dirai por quoi.
Einsi au gué joste .I. aunoi
Li uns vers l'autre s'adreça.
Li nostre chevaliers deça
Se merveille de ce qu'il voit:
Que cil qui ist dou gué n'avoit
Page067
Frain ne chevestre n'esperon,
Ne ne tient verge ne baston
Fors l'escu et la lance a droit;
Mes de si grant beauté estoit
Que nul plus bel n'esteüst querre,
N'onques ne fu en nule terre
Nus chevaliers veüz as ieuz,
A cui armes seïssent mieuz
Qu'a lui. Au chevalier escrie
Qui vient: "Chevaliers, ne vien mie
Avant! Se tu viens jusqu'au pas,
La joste avras eneslepas."
Et cil respont qui l'entent bien:
"Ce me plest mout, chevaliers, vien!
Ja l'avras, tu m'as desfïé."
Et cil, quant il fu fors dou gué,
Besse sa lance, si s'eslesse
Por joster, et Meraugis lesse
Cheval aler; que point nel dote.
Cil qui i met sa force tote
Done a Meraugis sor l'escu
De sa lance par tel vertu
Que sa lance peçoie en .II.;
Et Meraugis li merveilleus
Brandist sa lance, sel fiert haut
Si droit qu'il porte en mi le gaut
Le chevalier et son cheval
Tot en .I. mont; mes n'ot nul mal
Page068
Li chevaliers, en piez revient.
Sempres de l'espee qu'il tient
folio108a
S'offre a desfendre et vient avant
Vers Meraugis qui dit itant:
"Esta! que veus? Ne t'aprochier
De moi! Remonte en ton destrier,
Je t'en doing bonement congié."
Et cil respont: "Mal aie gié
Se je remont quant je sui jus!
Tant sui je pris se je sui sus.
Cuides tu que por ce te faille
Guerre? - Nenil, a la bataille
Te rapel, ja ne te faudrai."
"Ja a cheval ne t'assaudrai,"
Fet Meraugis, "honte en avroie!"
A pié descent en mi la voie,
Si s'entrevienent par esforz.
Li chevaliers qui mout fu forz
L'assaut et giete .I. coup dou plus
Si grant qu'au venir de lasus
Despiece et fent quan qu'il consieut.
Et Meraugis qui bien l'ensieut
Li vient encontre et se desfent
Si bien qu'il redespiece et fent
Quan qu'il consieut avant l'espee.
Page069
Trop a duré ceste meslee.
Damdeus! voire, ce n'avint mes.
Li chevaliers mout fu engrés
Et hardiz, mes plus est encore
Meraugis preuz et fiers aore.-
Et il por quoi? - Hardi le trueve
Tant qu'en la fin si bien se prueve
Meraugis qu'il l'outre et conquiert.
Li chevaliers vaincuz requiert
Merci, et Meraugis li prie:
"Di moi avant: que senefie
Que tu n'as frain n'esperons? Di!
Ce te covient, ou ja d'ici
Ne partiras!" Et cil qui crient
La mort respont: "Ce dont me vient,
Volentiers le vos conterai.
Oëz por quoi, jel vos dirai:
Li rois Patris de Cabrahan
Tint - a Pasques avra .I. an -
Cort si riche qu'onques ne fu
Plus riche, et lors furent venu
Tuit li chevalier de la terre.
Li rois les fist mander et querre
folio108b
Par toz les lieus, mout en i vint.
Des meillors chevaliers bien .XX.,
Ainz que la cort fust departie,
Page070
L'uns por l'autre par aatie
Firent veuz. Oëz que voerent:
Oianz les dames se vanterent
De chevaleries, si dist
Guivrez qui le premier veu fist
Que de tot l'an ne porteroit
Hauberc ne heaume, ainz josteroit
Toz desarmez fors de l'escu.
Li granz Riolenz qui la fu
Voa que ja mes ne gerroit
En covert devant qu'il avroit
Ocis chevalier en bataille.
Li Lez Hardiz de Cornoaille
Fu a la cort: cil se dona
As dames et aprés voa
Que ja pucele de si loing
Nel requerroit a son besoing
Qu'il n'i alast sanz conseil prendre.
Gaherïez lor fist entendre
Que tot cel an chevaucheroit
Page071
Einsi que ja n'encontreroit
Chevalier nul, por qu'il menast
S'amie, qu'il ne la besast
En pes ou tant se combatroit
A lui que li uns en seroit
Si las qu'il en avroit adés.
Et li crueus Seguradés
Voa que de tot l'an entier
Ne conquerroit il chevalier
Par force qu'il ne l'oceïst.
Que vos diroie? Chascuns fist
Son veu, et je qui la estoie
Me porpensai que je feroie
Tel veu que nus n'oseroit fere
Autel: lor dis, ses fis toz tere,
Que de tot l'an n'avroie frain
N'esperon ne verge en ma main
Por ce que ja mes ne ferroie
Mon cheval, ne ne li toudroie
Chemin por nul autre doner,
Mes tot cest an sanz demorer
Iroie tant que troveroie
Plus fort de moi. Que vos diroie?
folio108c
Einsi ai tenu mon chemin
Tant qu'or sui venuz a la fin:
Page072
Je ne puis dire ne savoir
Quel part j'arriverai le soir."
Cil li respont qui a droiture
Li dit: "Tu vas par aventure
Plus que nus, si n'as pas enfret
Ton veu por ce que je t'ai fet
Conoistre que je sui plus preuz
De toi. C'est tot; mes se tu veus
Merci avoir, si te covient
Aler la dont ma rote vient,
Tot cest haut bois; quant tu vendras
Outre cest bois, tu troveras
.II. dames en .I. paveillon
Qui font dueil; en la lor prison
Te metras et diras por quoi,
Et les salue de par moi."
Cil dist quant il ot escouté:
"Coment? Avez i vos esté
Au tref?" - "Oïl, j'i ai geü." -
"Vos ne tochastes a l'escu
Qui pent?" - "Si fis, je l'abatié." -
"Voire, mal avez esploitié!" -
"Et je de quoi?" - "Vos nel savez?
Li dëables est eschapez
Qui devant estoit en prison.
Or est par mauvese ochoison
Li païs tornez a hontage.
Page073
Ne comandez mes tel outrage
Que j'aille au tref; pas n'i iroie
Por morir, non, ainz sofferroie
Qu'en me trenchast ceste main destre.
Ci meïsme fet mauvés estre
A vostre oes." - "A mon oes, por quoi?
Or me covient savoir par toi,
Cui est li escuz." - "Jel vos die
Volentiers?" - "Vos ne savez mie
La verité?" - "Je la sai tote:
L'Outredotez qui riens ne dote
Et tant chevaliers a vaincuz,
L'i fist pendre, c'est ses escuz.
Voire, si vos dirai por quoi:
L'Outredotez dont je vos doi
Conter, ce est li plus crueus
Qui onques fust, et si est teus
folio108d
D'armes que nus ne l'ose atendre.
C'est une merveille a entendre
Que de ses fez! Mes neporquant
Sa proece et son hardement,
Or escoutez com il l'emplie:
Se il savoit, n'en dotez mie,
Bien loing .I. chevalier qui fust
Si preuz que toz li monz seüst
Sa proece, ja mes n'avroit
Page074
Joie devant que il l'avroit
Mort ou honi sanz ochoison.
Il ne voudroit mie reson
Avoir en lui, non, ainz la het
Si vraiement que quant il set
Bataille a fere, si enquiert
Li queus a tort, aprés requiert
Le tort por fere la bataille." -
"Por quoi?" - "Il veut que li torz aille
Devant le droit par son outrage,
Et s'il cuidoit avoir droit gage,
Ja mes a son jor ne vendroit,
Ainz veut dou tot tuer le droit."
"Voire, toz jorz mout par est torz,
Et si est droiz; donc n'est ce torz?" -
"Oïl, ce n'est reson ne droiz
Qu'uns hom puisse estre et torz et droiz."
"Si puet: li menbre sont defors
Droit, mes li cuers li cloche el cors,
Qui li fet sa reson tortue
Si torte que de son tort tue
Le droit; par tant di orendroit
Que l'oevre est torte en l'ome droit."
"C'est voirs, mes plus i a encore:
Page075
Il est teus, s'il encontroit ore
.I. chevalier qui conduisist
S'amie, ainçois qu'il li deïst
.I. sol mot, ja li corroit sore;
Et s'il en venoit au desore,
Il honiroit la damoisele
Voiant lui, ce n'est pas novele.
Enfin trop est de males mors.
Autant avint li dieus d'amors
Qui fet les durs cuers sosploiier
Qu'il li covint d'amors proiier
Une dame, si la requist
D'amors, et la dame li dist
folio109a
Enfin que ja ne l'ameroit." -
"Por quoi?" - "Por ce que il estoit
Si maus; et cil qui fu sospris
De s'amor qui tant en ot pris,
Proia et dist que il feroit,
Comandast quan qu'ele voudroit.
Que vos diroie? El creanta
Son bon, mes ainçois li jura
Sor sainz que ja mes n'ocirroit
Home, ne tort ne li feroit
Devant qu'aucuns li forfeïst."-
"Et plus vout ele qu'il feïst?" -
"Oïl, ele le fist entrer
En sa terre et aprés jurer
Sor sainz que ja mes n'en istroit
Por riens se por vengier n'estoit
Page076
Sa honte, s'en li avoit fete.
L'Outredotez qui n'a soffrete
Fors de mal fere cui li plest,
Des l'ore fist en la forest
Son escu pendre en mi la place
Por ce qu'il veut qu'en li mesface,
Lors il sera fors de prison.
Estes vos que sa desreson
Corra partot et ceste angoisse!
N'est nus si hardiz qui conoisse
Le roge escu au noir serpent,
Qui ost aprochier d'un arpent
Dou paveillon ne de l'escu;
Sol dou veoir sont tuit vaincu
Li chevalier de ceste terre."
Dit Meraugis: "Donc le vet querre,
Ce cuit, une autre damoisele
Que je trovai; c'est la mains bele
Des .III., si tenoit une lance
En sa main. Quel senefiance
Est ce? Sez en tu dire rien?" -
"Oïl, et si conois mout bien.
Cele sanz faille li vet dire.
Deus la het mout!" - "Ci n'a que dire
En li?" - "Ele ert la por guetier
Page077
L'escu. N'avoit autre escuiier
Li chevaliers quant il errot;
Mes la lance avuec lui portot
Trusqu'a cele hore qu'il lessa
Son escu, et por ce bailla
Sa lance a cele qu'il vousist
Qu'aucuns par force li tousist.
folio109b
Si refust fors par cest mesfet.
Or est einsi: cele s'en vet,
La lance el poing, qui li dira;
Et quant l'Outredotez vendra,
Plus en sera qu'onques ne fu
Fel et crueus; de ce ont eü
Les dames dueil." - "Por quoi le font?" -
"Sire, por ce que eles sont
Franches, si heent le forfet.
Autant com cele qui s'en vet
Het bien, heent cestes l'outrage.
Ja por destorber cest domage
Ont conversé .I. an entier,
Et cele i ert por atisier
Le mal que ja mes par son vueil
Ne faudroit, et celes ont dueil
Por ce que verront essillier
A la venue au chevalier
Le païs. Sa grant desreson
Metra avant et en prison
Page078
Reson." - "Qui l'a desresonee?" -
"Fortune qui li a donee
La colee dont ele est morte.
Or veut chascuns clorre sa porte,
Ja contre lui n'en istra nus
La ou il vient. Il n'i a plus,
Mes tuit dïent par verité:
Fuiiez! vez ci l'Outredoté!
Or vos ai dit dou tot por quoi."
Dit Meraugis: "Quant c'est par moi,
Se je cuidasse anuit trover
Le chevalier, dou retorner
Fust a certes li consaus pris.
Mes j'ai .I. autre afere empris
Par quoi je ne puis delaiier
En cest païs; por apaiier
Les dames te covient aler
Au tref." - "N'en fet mie a parler!" 
"Si fet." - "Non fet! pas n'i iroie!"
"Tu si feras!" - "Je non feroie
Por riens!" - "Si feras par mes ieuz
Ou ja morras! Que te plest mieuz:
Morir ou fere mon message?"
Cil qui dote por son domage
Se lest vaintre et dit: "Par mon chief,
Sire, bien voi que cest meschief
folio109c
Me covient fere, j'i irai.
Page079
Mes de par cui, quant je vendrai,
Me rendrai je? Qui m'a conquis?" -
"As dames de par Meraugis
Te rendras pris come lor home.
Et tu qui es?" - Lors se renome
Li chevaliers et dit aprés:
"J'ai non Laquis de Lampagrés.
Or n'i a plus. Vos comandez
Vostre bon. Se vos lor mandez
Folie ou sens, je lor dirai
Sans dote, ja n'en mentirai.
Et se vos lor mandez sorfet,
La honte, se l'en la me fet,
En sera vostre et li maus miens."
"Va toz seürs, ne dote riens!
Por quoi je puisse chevauchier,
Se tu trueves le chevalier,
Retorne a moi tot erraument.
Et s'il n'i est, tant l'i atent
Qu'il viegne. Por Deu, si conforte
Les dames et honor lor porte.
Se tu le fes, bien t'en vendra.
Et quant li chevaliers vendra,
Ja mar a lui te mesleras!" -
"Que ferai donc?" - "Tu li diras
Mon non, et di que je li mant
Que por ce que je ne demant
De lui se la meslee non,
Por mal et por honir son non
Page080
Getai son escu a la terre.
Et s'il en veut venjance querre,
Sel ramaine tot erraument."
Ce dit Laquis: "Et je coment?
Vos alez la, c'est vostre voie,
Et je vois ça; je ne savroie
Ou vos querre." - "Tu si savras!" -
"Et je coment?" - "Tu me siuras
Trestotes les voies a destre;
Ja ne torneras a senestre
Por nul besoing devant mardi.
Bien m'en pues croire quant jel di."
"Si faz je, sire." A tant s'en part
Laquis; Meraugis d'autre part
Reprent a destre son chemin.
Or quiert l'esplumeor Merlin.
folio109d
Et Laquis vient au paveillon.
As .II. dames come prison
Se rent et dit eneslepas
De par cui; encor n'estoit pas
L'Outredotez qui riens ne dote
Venuz. Et quant Laquis ot tote
Sa reson dite, si descent;
As dames dit que il atent
L'Outredoté et atendra
Tant qu'il viegne; lors li dira
Tot plainement ce qu'il a quis.
Celes qui conurent Laquis,
Et qui pas ne vuelent sa honte,
Li prïent: "Beaus amis, remonte,
Page081
Si t'en va! Nos savon de voir,
Se l'Outredotez puet avoir
De toi bataille, il t'ocirra."
Laquis qui pas ne se movra
Por riens qui li doie avenir,
Sejorne tant qu'il voit venir
L'Outredoté. - Coment vient il? -
Il vient aïrez come cil
Qui semble qu'il doie le mont
Confondre. Si com la noif font
Tot devant lui de son aïr:
Einsi s'angoisse de venir
Au paveillon. Quant il fu pres,
Si vit Laquis de Lampagrés.
Ses voisins ert, bien le conut.
D'un oeil esgarde, aprés corut
Tot droit au fresne, et quant il voit
Son escu qui la jus gisoit,
Sel prent et dit, quant il l'ot pris:
"Coment, dëable, est ce Laquis
Qui vint ça mon escu abatre?" -
"Nenil." - "Si es, vien toi combatre,
Nus escondiz ne t'i vaut rien!"
Laquis respont: "Ce ni je bien
Que je nel fis, ainz l'abati
Uns a cui je me combati,
Qui m'a conquis." Tot li aconte
Page082
Le voir, et plus li met el conte
Que Meraugis ne li conta.
L'Outredotez qui escouta
L'orgueil que Meraugis li mande,
S'estent d'orgueil et si demande:
folio110a
"Quel part vet il?" - "Jel vos dirai."
"Donc sera ce quant je t'avrai
Conquis par force. Va monter,
Il te covient a moi joster."
"Avoi!" dit Laquis, "non ferai,
Je me rent pris et vos menrai
Aprés lui." - "Ja ne m'i menras,
Ne voie ne m'i nomeras
Devant que je sache sanz faille
Li queus est plus forz en bataille
De nos; si te dirai por quoi:
Que se tu es plus forz de moi,
Ne sai por quoi j'alasse querre
Plus fort; se je te puis conquerre,
Ne te faing pas, itant te menbre,
C'est sanz merci, tu perdras menbre."
Laquis respont: "Je desfendrai
Mes menbres tant com je porrai."
Qu'en diroie? C'est la parclose!
Ceste bataille est nule chose,
Qu'en petit d'ore fu vaincue.
L'Outredotez qui toz les tue
Le vaint par force et l'a conquis.
Et les .II. dames por Laquis
Crïent merci, mes c'est noienz;
Page083
Qu'onques merci n'entra laienz.-
Ou? - En son cuer que Deus maudie!
Por ce qu'il veut que Laquis die
De Meraugis qu'il en a fet,
Le fiert et dit: "Quel part s'en vet?
Nome la voie!" - "Sire, a destre."
Et il le prent devers senestre,
Si li fet .I. des ieuz voler
Et dit que c'est por assener
A la voie qu'il ne l'oblit.
Mout l'a blecié, aprés li dit:
"Laquis, ja plus ne te ferai
Mal devant la, lors t'ocirrai
Que j'avrai Meraugis vaincu.
Et j'avroie mout bel vescu
Se je avoie de vos .II.
La bataille. Ja mes li deus
Que j'ai el cuer ne s'en istra
Devant que cele hore vendra
Que me soie de lui vengié.
Devant que l'aie detrenchié
folio110b
N'as tu garde, met t'a la voie!"
Lors s'en vet. Einsi le convoie
Laquis quil maine aprés son mestre.
Les dames qui ne voudrent estre
El paveillon plus longuement,
S'en vont et plorent tendrement
Por Laquis. Or s'en vont einsi
Celes qui ont oï le cri.
Page084
Laquis maine l'Outredoté
Grant oirre, et mout se sont hasté
Por le chevalier aconsiure.
Einsi se hastent de lui siure,
Et Meraugis qui fu devant
S'en vet le pas et oirre tant
Par mi la forest totes voies
Qu'au quarrefor de .IIII. voies
Est arrivez. Quant il vint la,
Sa voie esgarda, si pensa
A Laquis qu'il ot envoiié
Au tref, et tant a delaiié
Que li termes est trespassez
Dou mardi qui li fu nomez,
Si outre que juesdis estoit;
Et dit, por ce qu'il ne venoit,
Que bien pooit sanz lui mesfere
La voie qui li porroit plere
Aler. Aprés dit, non fera;
Mes por mieuz fere s'i tendra
Cel jor s'il nel let por besoing.
A tant s'en vet, ne fu pas loing,
Quant dou bois li ist au travers
Li nains camus, li goz despers.
Mot ne li dit, ainz a levé
Un baston dont il a doné
Au bon destrier desus la teste;
Hauce et refiert, et cil s'arreste
Qui li crie: "Nains, fui de ci,
Page085
Poi s'en faut que je ne t'oci!"
"Tu m'ocirroies?" fet li nains,
D'angoisse tremble et tent les mains,
Ses joint et dit: "Pren le meillor:
Vez ci la honte et ci l'onor
Que je te doi por le changier.
C'est la promesse d'avant hier
Que je te fis. Quel la feras?"
"Fui, nains! ja ne m'i changeras,
folio110c
Noient ne riens ne te demant.
Va, as dëables te comant!
Que veus?" - "Je vueil que tu retornes.
Se tu vas la ou tu t'atornes
A aler, tu i avras honte."
"Coment?" - "Je te rendrai bien conte.
Retorne arriere eneslepas;
Que se tu vas avant .I. pas,
Tu es honiz. Por sol itant
Que tu es venuz si avant
Te melle ja la honte as ieuz."
Li chevaliers qui aime mieuz
Honor que honte s'il pooit,
S'arreste et dit que il iroit
La ou li nains voloit aler:
"Di, nains, ou me veus tu mener?
Ou est l'onor?" - "Je t'i menrai."
"Maine m'i donc, si la verrai."
"Volentiers, sire." - A tant s'en vont
Arriere au quarrefor et sont
Page086
Par une autre voie torné.
Deus, com li nains l'a retorné
De grant honte! - Coment? - S'il fust
Avant alez, la nuit geüst
Sanz retorner dedenz l'essart
Ou li hardi sont plus coart
Que lievre, et li coart hardi
Plus que lion. Bien est einsi
Quant il s'en vont autre chemin.
Mout ont erré et en la fin,
Quant il furent dou bois issu,
Si ont de l'autre part veü
Un chastel joste une riviere
Trop haut; ne sai de quel maniere
Il fu assis sor une roche,
Mes a tant en tailliez la broche,
C'est li plus beaus dou mont a chois.
Entre le chastel et le bois
Virent en mi la praerie
La plus bele chevalerie
Qui onques mes fust assemblee.
Tote sa gent i ot mandee
Li rois Amangons qui tenoit
Cort si riche com il devoit
Tenir au premier jor de l'an.
Ausi com il firent antan,
folio110d
Estoient la por bohorder
Venu. Li rois i fist porter
Son tref; devant le tref avoit
Page087
Une quintaine. La estoit
Tote la joie, et tot ce vit
Meraugis qui au nain a dit:
"Queus gent sont ce?" - "Sire, par foi,
Ce est l'onor que je vos doi
Changier por honte. Ja l'avrez
Si grant que toz jorz en serez
Honorez. Or dou chevauchier!"
Einsi s'en vont a l'aprochier.
Devant le tref ont coneü
Le roi, et la reïne i fu
Joste le roi sor .I. perron.
La furent tuit li haut baron
Assemblé, s'en i ot d'armez
Bien .XXX.; a tant les a esmez
Li chevaliers, ne mie a mains.
A pié, les espees es mains,
S'estont li .XXX. chevalier.
Un en i ot sor .I. destrier,
Armé, voire, si a porfil
De totes armes come cil
Ou riens ne faut, ainz fet semblant
Que de joster ait bon talant.
Cil s'aprochent. Quant Meraugis
Fu pres dou roi, li nains l'a pris
Par la resne, sel maine avant
Devant le roi, lors dit itant
Que tuit l'oïrent li baron:
"Sire, vez ci mon champïon.
Page088
Fetes moi droit!" - "Nains, volentiers."
D'entre les .XXX. chevaliers
A cez paroles est issuz
Cil a cheval et est venuz
Devant le roi, bien fu armez.
"Nains", fet li rois, "cist est montez
Toz prez come de soi desfendre.
Que veus?" - "Ja n'en quier conseil prendre,"
Fet li nains, "metez les ensemble;
Car mes champïons, ce me semble,
N'en feroit concorde ne plet."
Ce dit li rois: "Puis qu'einsi vet
Que tu es sanz misericorde,
Ne cil ne veut pes ne concorde,
folio111a
Aillent ensemble, il n'i a plus."
A cez paroles se trest sus
Li chevaliers qui por joster
A pris l'escu. De l'encontrer
S'acesme. Quant Meraugis voit
Que par force li covenoit
La bataille deduire as cous,
Si pense et dit: "Or sui je fous!
Voire, li nains m'i tient sanz faille 
Quant il por vaintre sa bataille
M'a presenté devant cest roi.
Si ne sai a cui ne por quoi,
Non, mes itant sai je por voir:
Se je ne vueil plus honte avoir
Page089
Qu'onor, combatre me covient."
Lors dit au nain qui vers lui vient:
"Est ce ce que tu m'as promis?"
Li nains respont: "Sor vos l'ai mis.
N'aiiez dote, ja n'en ferai
Pes ne concorde se je n'ai
Ma querele et vostre honor quite."
Oëz quel traïson a dite
Li nains: que quant on li oppose
D'un, il respont d'une autre chose
Et toz jorz dit: "Mes champïons
Qui est plus hardiz qu'uns lïons
M'a dit que ja pes n'en fera."
Meraugis l'ot qui pas n'osa
Dire: "Tu menz!" S'il desdeïst
Son mestre, assez fust qui deïst:
"Cist est vaincuz tot en estant!"
Por ce se test, mes il est tant
Vers lui iriez que plus ne puet;
Grant chose a en fere l'estuet.
Por ce que fere li covient,
Meraugis point et cil li vient
Por encontrer. Estes les vos
Ensemble si que li retros
Des lances volent vers les nues.
Au chaple des espees nues
S'entrevienent sanz menacier
Si qu'il font les heaumes d'acier
Fendre et par force estenceler.
Proece ne se puet celer.
Page090
[Se li chevaliers ert hardiz,
A .C. dobles l'ert Meraugis.]
folio111b
Mout se merveillent li baron
Ou li nains prist tel champïon.
En la fin, qu'en diroie plus?
Li champïons au nain camus
A par force l'autre vaincu;
Contre terre sor son escu
Le tint a la teste couper.
"Sire, eles sont a marïer,"
Fet cil qui plus ne se desfent.
Et Meraugis qui pas n'entent
Qu'il veut dire, ja l'oceïst
Sanz respit quant li rois li dist:
"Lessiez, assez en avez fet;
L'onor est vostre, il la vos let
Puis qu'a force l'avez conquis.
Tenez mon gant, je vos sesis
De l'onor et des damoiseles.
.C. en i a et plus de beles
Qui sont a vos a marïer."
Meraugis ot le roi parler,
Si se merveille et dit au roi:
"Vos me donez si ne sai quoi,
Ne sai se c'est preuz ou domages,
Mes que j'i entent mariages
De dames dont je ne sai rien."
Page091
Ce dit li rois: "Vos savez bien
Coment la feste est establie."
Dit Meraugis: "Je nel sai mie,
Mes s'il vos plest, jel vueil savoir."
Li rois respont: "Sanz decevoir
Vos en dirai la verité:
Il a toz jorz costume esté
En cest roiaume qu'a cest jor
Covient que tuit mi vavassor
Et mi baron, ou que il soient,
S'il ont filles, qu'il les envoient
A ceste feste chascun an.
Einsi com eles sont oan,
Covendra qu'ancoan i soient
Totes." - "Por quoi les i envoient
Lor pere chascun an einsi?" -
"Por ce que, quant eles sont ci
Et tuit li chevalier i sont
Assemblé d'aval et d'amont
Si com vos veez a voz ieuz,
Cil que l'en voit qui joste mieuz
folio111c
Et qui puet sor toz desresnier
Qu'il n'i ait meillor chevalier,
Si conquiert si grant digneté
Que dou tot a sa volenté
A les dames a marïer,
Qu'a son voloir les puet doner
As chevaliers et departir.
Mes s'il veut par reson partir
Qu'il ne li tort a vilainie,
Page092
Au doner ne li covient mie
Qu'il les abest ne desparage.
S'einsi les depart sanz outrage,
L'en li atorne a cortoisie;
Et s'einsi est qu'il n'ait amie,
Il choisist cele que il veut.
Einsi le faz, einsi le seut
Mes pere fere com devis.
C'est l'onor dont je vos sesis
Devant toz, car reson le prueve.
Ne cuit qu'encontre vos se mueve
Nus chevaliers que je conoisse;
Contre cestui por nule angoisse,
Se vos ne fussiez ça venuz,
Ne s'en fust chevaliers meüz
Qui por joster s'osast eslire.
Antan ot il sanz contredire
L'onor, qu'onques coup n'i feri.
Einsi avint. Or est einsi
Que vos avez l'onor conquise."
Meraugis qui a l'onor prise
Et receüe par son gant
Mercie le roi, mes itant
Li dit: "Sire, ja ne lerai
Le chevalier, ainz l'ocirrai
Se li nains n'a quan qu'il demande!"
Que que ce soit, li rois comande
[Que il ait sa volonté tote
Page093
Se ce n'est chose trop estote.]
Il vient et dit sanz demorer:
"Sire, a vos est de moi doner
Ma joie. J'ai tot mon creant
De celui que voi recreant,
Qui estoit sires a un mot
Sor toz et tant se sorcuidot
Par sa force qu'il prometoit
Devant la feste et departoit
folio111d
Les dames a sa volenté.
A la Pentecoste en esté
Tint cist rois cort, et il i vint.
Aprés mangier en promist .XX.
Des plus beles totes a chois.
Et je qui en maint bon lieu vois
Ving devant lui tot asseür.
Ilueques par son maleür
Li demandai une pucele,
Mes c'ert la sole damoisele
Qu'en cest roiaume n'a sa per.
Nus ne la vousist demander
Fors moi, si vos dirai por quoi:
Ele est plus camuse de moi
Et plus corte, si est boçue.
Ausi come fous et maçue
Doivent toz jorz aler ensemble,
Devon nos nos .II., ce me semble,
Page094
Par droit l'uns l'autre chalengier.
Je demandai au chevalier
Qu'il me donast, et il me dist:
"Fui, goz, de ci!" Qu'il m'escondist
Me corroçai; eneslepas
Respondi qu'encor n'estoit pas
Li dons a lui si quitement,
Et qu'il fesoit liez de noient
Ceus a cui il les prometoit.
Et cil qui orgueilleus estoit
Se corroça et vint vers moi:
Onques nel lessa por le roi,
Ainz me feri en plaine cort
D'un de ses doiz sor mon nes cort.
Mout m'en pesa que par despit
Le fist; ilueques sanz respit
Dis et offri a desresnier
Qu'onques par main de chevalier
Ne fui feruz, ainz dis einsi
Qu'il en avoit son pris honi
Si ledement qu'il en estoit
Einsi honiz qu'il ne devoit
Dame doner de cele main,
Et tant qu'au roi a l'endemain
Donai mon gage de trover
Un chevalier por lui prover
En sa cort qu'il ne devoit estre
Droiz chevaliers de sa main destre.
Page095
folio112a
Or est einsi dou chevalier
Que vos l'avez fet esclenchier;
Et puis que vos conquis l'avez,
En vos est que vos me poez
Doner la riens que je plus vueil.
Ceste demande est sanz orgueil;
Que s'ele est gentiz de lignage.
Je sui assez de haut parage,
Mes pere fu parenz le roi."
"Nains, je n'ai pas honte de toi,"
Ce dit li rois qui s'en sozrit;
"Nains, il est bien voirs que l'en dit:
N'est si hauz bois qui n'ait brocille.
Sire, car li donez la fille,
La riens el mont qui plus li semble.
Ne sai s'il furent né ensemble:
Chascuns est si camus naïs
Qu'il s'entresemblent de laïs."
Meraugis respont erraument:
"Sire, a vostre comandement
Me plest qu'il soit, et si vos pri
Des autres la vostre merci.
Marïez les a ceste foiz
Et ancoan de fi sachoiz,
Se je sui vis, je revendrai
A cest jor et sejornerai
Page096
S'avient que l'onor me remaigne.
Par vostre los, que n'i mespreigne,
Les donrai totes de ma main;
Car en cest point jusqu'a demain
Ne remaindroie por proiiere."
"Puis que vos en nule maniere,"
Fet li rois, "ne remaindrïez
Et que vos plus n'en ferïez,
Or nos aprenez vostre non,
Et je vos acreant le don
Que jes donrai a ceste foiz
Por vos, mes que vos creantoiz
Le revenir certainement."
"De ce parlez vos por noient,
Sire! J'ai a non Meraugis
De Portlesguez. Se je sui vis,
D'ui en .I. an je serai ci."
Lors a li rois le nain sesi
De s'amie, puis prent congié
Meraugis; lors l'ont convoiié
folio112b
Li chevalier a grant deduit.
Onques tel joie ne tel bruit
Ne veïstes a nule feste
Com aprés lui, tant qu'il s'arreste
A l'entree d'une forest
Et dit au roi que, se li plest,
Qu'il s'en retort, et il si fist,
Et Meraugis son chemin prist.
Page097
Li Outredotez et Laquis
Qui ont toz jorz Meraugis quis
Ont tant erré qu'il sont venu
As .IIII. voies, la ou fu
Meraugis que li nains trova,
Et tant li dist qu'il retorna
Einsi com vos l'avez oï.
lluec se tint por esbahi
Laquis quant il voit tant chemin,
Et dit: "Sire, ce est la fin,
Je ne vos sai avant mener
De ci, ne ne sai assener
Au quel chemin nos nos tendron;
Que Meraugis que nos queron
Me dist, se trover le vousisse,
Que la destre voie tenisse
Sanz desvoiier jusqu'a mardi.
Li jorz est passez et vez ci
.IIII. voies. Je n'en sai plus,
Mes tornez ou aval ou sus
Ou cele estroite ou cele grant,
Que la ou vos irez avant
J'irai aprés!" Lors s'en torna
L'Outredotez qui regarda
Et dist: "Laquis, est il einsi
Page098
Que tu ne sez avant de ci
De Meraugis ne vent ne voie?" -
"Oïl." - "Laquis, s'or t'ocioie
De m'espee, j'avroie droit.
Mes por tant le les orendroit,
Que je vueil que Meraugis voie
Sa honte. Or t'en va cele voie!
Einsi me plest. Sez tu por quoi?
Se tu le trueves ainz de moi,
Di que jel quier et si li conte
Qu'en son despit t'ai fet la honte
Por lui honir, et neporquant
Au departir me di itant:
folio112c
Quel escu porte Meraugis?
Que par l'escu en toz païs
Le vueil conoistre se jel truis."
"Sire," fet Laquis, "bien vos puis
L'escu deviser." Lors li dit
De l'escu selonc ce qu'il vit
Com il ert fez. A tant s'en vont,
Chascuns s'en part. Einsi le font
Qu'il ne s'entresont comandé
A Deu. Tant a Laquis erré
Que au matin pres d'une broche
Devant les plains de la Bacloche
A Meraugis aconseü.
Lidoine l'a aperceü
Page099
Avant, sel mostre a Meraugis.
Cil qui se torne vers Laquis
L'esgarde et choisist par devant
Qu'il vet d'un oeil l'autre plorant.
Mout l'en pesa, par verité!
Bien sot qu'ot fet l'Outredoté,
Encontre vint, sel salua.
Totes voies li demanda:
"Qu'est ce, Laquis? Qui t'a ce fet?"
Et cil li respont entreset:
"Sire, vos! de vos me plaing gié;
Que por vos m'a l'en domagié.
Vos m'envoiastes maugré mien
Au tref dont je savoie bien
Que ja entiers n'en revendroie.
Or est einsi que je voudroie
Morir ou erragier mon vueil."
Or a Meraugis honte et dueil,
Voire, si grant que il ne set
Que dire, ainz se maudit et het
Et dit: "Laquis, bien sai et voi
Que tu es maubailliz por moi.
Ce t'ai je fet, que t'en diroie?
Por ce que la honte en est moie,
Sez tu que prometre te vueil?
Je ne te puis rendre ton oeil
Page100
Neïs por toi doner le mien.
Mes se tu sez ou il est, vien,
Si m'i maine. Je te creant
Que, se jel truis, tot maintenant
Te rendrai - ou il m'ocirra -
La main dont il le te creva."
folio112d
"Ha!" dit Laquis en sospirant,
"Se je ja mes vivoie tant
Que je veïsse cors a cors
Vos .II. ensemble en .I. champ fors
Combatre a l'espee d'acier
Tant que fust as testes trenchier,
Onques de riens si liez ne fui;
Car je he vos et si he lui.
Mes ce n'iert ja, car jel lessai
Hui a .III. jorz, mes je ne sai
Ou il ala ne qu'il devint.
Mes par la voie que il tint
Ne vint il pas en ceste terre.
.C. dëable le puissent querre!
Je ne puis plus aler aprés,
Ainçois m'en vois a Lampagrés
Por sejorner, malades sui."
Dit Meraugis: "Onques ne fui
Plus dolanz que je sui de toi;
Mes je te jur, tien en ma foi,
Que ja mes ne retornerai
Page101
En mon païs, ainçois t'avrai
De l'Outredoté si vengié
Qu'il en avra le poing trenchié."
Or n'i a plus, Laquis s'en vet
Dolanz; dou grant dueil que il fet
Plore Lidoine tendrement.
Cui chaut? - Plorer n'i vaut noient.
Meraugis oirre qui vet querre
L'esplumeor; en mainte terre
L'a demandé tant qu'au matin
Joste la mer pres d'un chemin
Vit .I. roche mout grifaigne.
La roche ert loing en la montaigne,
Mout haute, tote d'une pierre,
En toz tens verz; qu'ele estoit d'ierre
Bordee entor a la reonde.
Desus cele roche reonde
Qui ert la plus haute dou mont
Vit Meraugis lasus amont
Bien jusqu'a .XII. damoiseles.
Iluec se sieent les puceles
En .I. praiel soz .I. lorier.
En toz tens servent de pledier.-
De quoi? De ce qui a esté?-
Page102
Non pas, ja n'en sera parlé
Par eles, ne ja n'avront pes;
Ainz i tienent toz tens lor plez
folio113a
De ce qui est a avenir.
Et cil qui pensa dou venir
Est acoruz plus que le pas
Desoz la roche; eneslepas
Ala entor, mes il n'i voit
Par ou monter; qu'il n'i avoit
Huis ne fenestre ne degré.
Ne sai se Deus la fist de gré.
Mout estoit haute et de beau tor.
Et Meraugis ala entor
Trois tors ou plus et lors cria:
"Dames, par ou irai je la?"
Une des dames respont lués:
"Beaus sire, il n'i a a vostre oés
Par ou monter; mes dites nos
Que vos volez." - "Je vueil a vos
Parler .I. poi." - "Dites nos donques
Que vos volez." - "Ce n'avint onques
Que je de ci," fet Meraugis,
"Die oianz toz que j'ai ci quis,
Page103
Mes fetes moi lasus monter."
Cele cui anuie a parler
Se vet seoir, sel let debatre.
Et cil cria .III. foiz ou .IIII.
Ainçois que nule li vousist
Respondre, tant qu'une autre dist
.II. foiz ou .III. au chevalier:
"D'iluec vos covient conseillier,
Que ça en haut ne monte nus."
Et Meraugis qui ne puet plus
Prendre, li crie: "Dites moi
De Gauvain, le neveu le roi,
Savez en vos nules noveles?"
Lors dit la dame des puceles:
"Diva, chevaliers anuieus,
Va t'en, se tu croire me veus,
La voie a destre contremont.
Outre cest bois au pié dou mont
Troveras ja une chapele
Et une croiz; onques plus bele
Ne fu. Quant a la croiz vendras,
A la croiz te conseilleras."
Et cil respont et dit itant:
"Quant vos de ce que je demant
Noveles dites ne m'avez,
Or me dites, se vos savez,
folio113b
Par ou j'irai plus droit chemin
Page104
Querre l'esplumeor Merlin.
Ja en orrai parler, ce croi."
Cele respont: "Esgarde moi,
Vez ci l'esplumeor, j'i sui.
Assez porras muser mes hui,
Que ja plus riens ne t'en diron,
Ne ce ne quoi, ne o ne non."
Et cil qui ne se joë mie
Lieve la teste, si lor crie:
"Coment, pucele, est ce gabois?
Li nains me dist, pres a d'un mois,
Se ja mes trover le devoie
Nul jor, que parler en orroie
Ici a cest esplumeor;
Si i muserai tote jor,
Ce m'est avis, par ça defors.
Par saint Denise, se mes cors
Peüst par force aler lasus,
Je cuit que j'en seüsse plus."
Cele respont come sorfete:
"Bien fust ele si haute fete,
La roche; quant vos n'i poez
Monter par force, or i jupez
Page105
Tant qu'il m'anuit." Lors s'est assise.
Meraugis a sa voie prise
Si corrociez com il estoit,
Et chevauche tant que il voit
La chapele et la croiz devant;
Mes onques riens nee vivant
Ne vit entor la croiz de marbre.
El planistre soz .I. haut arbre
Descent, en la chapele entra,
Par tot cerche, mes n'i trova
Creature; lors s'en revient
Et dit: "Or sai, por fol me tient
Cele qui ci m'a fet venir.
He! Deus, que porrai devenir!
Je voi la croiz et que ferai?
Qui me conseillera? - Ne sai."
Einsi s'en vet cil dementant.
Et s'amie qui fu devant
La croiz, esgarde contremont.
En .I. braz de la croiz amont
A unes letres d'or veües.
Aprés, quant el les ot leües,
folio113c
S'esfroie et dit a haute voiz:
"Sire, en cest braz de cele croiz
A unes letres d'or vermeilles,
Mes les letres dïent merveilles."
Page106
Et cil qui bien lire savoit
Regarda en la croiz et voit
Les letres qui dïent itant:
"Chevaliers, tu qui vas querant
Conseil, se trover le pooies,
.I. gieu te part. Vez ci .III. voies:
Ceste premiere voie ci
A non la voie sanz merci,
Et bien saches, se tu i vas,
Que ja merci ne troveras.
Et se tu veus merci avoir
De rien, itant saches de voir
Que c'est noienz dou retorner.
Por ce, se tu veus la torner
Et tu ja mes veus reperier,
Ci te covient merci lessier.-
Et la seconde, com a non?-
C'est la voie contre reson.-
Por quoi? - C'est legier a prover:
Contre reson t'estuet ovrer
Par tot, se tu vas cele voie.
Ja nus qui cele part s'avoie
Ne trovera en nule place
Home, ne qui reson li face.
Et la tierce, qui torne a destre,
Est sanz non et bien le doit estre.-
Por quoi sanz non? - Je n'en sai plus
Fors tant qu'onques n'en revint nus
Page107
Par ci qui la se vousist trere.
Et por ce que nus n'en repere
Ne puis je savoir ou il vont,
Ne qu'il devienent ne s'il sont
Reperié par aillors ou non.
Et por c'est la voie sanz non.
Or pues choisir et si iras
La quel des .III. que tu voudras."
Aprés ice dit Meraugis:
"De cest conseil que j'ai apris
Ne me sai je mieuz conseillier,
Non, ainz me puis plus merveillier
De ce que j'oi que d'autre chose.
Qu'en diroie? A la parclose
folio113d
Choisir m'estuet, ce covient mon.
Dame," fet il, "quel la feron?" -
"Ne sai," - "Coment? Si ne savez?" -
"Je non," fet ele, "mes alez
Ou que ce soit, je vos siurai."
Il li respont: "Dame, j'irai
Cele sanz non; einsi me plest,
En cez .II. autres me desplest
Contre reson et sanz merci.
Ce m'aprent a movoir d'ici;
Que cele part n'a point de bien.
Mes cele autre ne me dit rien
Page108
Se j'irai bone voie ou non;
Encontre ce me dit reson
Que j'aille plus seürement,
Je ne sai ou; que malement
Sui je dou tot asseürez."
"Alon!" fet cil, fet cele: "Alez!"
Lors n'i a plus, a tant s'en vont
La voie sanz non et tant ont
Chevauchié qu'il ont trespassee
La forest; joste une ramee
S'en issirent fors en la plaigne.
Avant, desoz une montaigne,
Ont la cité sanz non veüe
Qui puis fu la cité perdue
A es son oes; car il la quist
Aprés et en grant fes s'en mist
De trover la; nel trova pas.
Einsi li chevaliers le pas
Vet chevauchant vers la cité.
Onques nule de sa beauté
Ne vit, trop ert bele a devise.
Bien estoit por la mer assise,
Devant li batoit grant navire,
Beau havre i a, n'i ot que dire.
Enfin de grant richece estoit.
Einsi li chevaliers venoit
Page109
Qui encontre .II. damoiseles,
Un nain devant. S'eles sont beles,
Ce ne fet pas a demander.
Devant font a lor nain porter
.I. fuiret et .IIII. roiseus.
Li chevaliers vint vers les .II.
Puceles, ses a saluees.
"Vos avez les bornes passees,"
folio114a
Font eles, si ne dïent plus,
Fors en alant dïent: "mar fus!"
Si haut que bien les entendi.
Li chevaliers plus n'atendi,
Ainçois s'en vet grant aleüre
Tant qu'un garçon par aventure
A encontré, si le salue.
Li garçons qui pas nel salue
S'arreste, mes ce fu petit.
Autant com celes li ont dit,
Li dit; onques plus n'en porta.
Li chevaliers qui s'arresta
S'esmerveille et lors dit s'amie:
"Cez genz ne m'asseürent mie." -
"De quoi?" fet il. - "Sire, ne sai,
Fors sol itant que paor ai
Si grant qu'onques mes n'oi greignor." -
"Et vos de quoi? N'aiiez paor
Page110
De riens! Bien sachiez sanz dotance:
Se je ne pert par mescheance,
Ja por paor riens ne perdron.
Soiiez tote seüre, alon!"
"Si sui je." Einsi en parlant
S'en vont et si aprochent tant
De la cité que cil d'amont
- Li chevalier qui dedenz sont -
Les aperçurent. - Et que firent? -
Quoi? Ausi tost com il les virent,
Il cornerent el chastel prise.
Lors, se la cité fust esprise,
N'i eüst pas greignor tumoute;
Et li chevaliers qui escoute
La tumoute - qu'il ot corner
Prise et einsi la font aler
Com s'il eüssent le port pris -
N'ot pas en sa contree apris
Qu'en cornast prise sanz riens prendre.
"De ce," fet il, "ne sai aprendre
Que ce puet estre?" - "Sire, non,"
Fet Lidoine, "nos ne savon
Que ce sera." - "Soit qu'estre veut!
Page111
Assez cornent, ce que me deut?"
Fet li chevaliers, "nule chose!"
De la cité qui bien fu close
Voient par mi la porte issir
La gent et la terre covrir
folio114b
Dou pueple qui fors s'en issoit.
N'i remaint dame qui n'i soit
Venue, et totes vont chantant.
Les puceles dont i ot tant
Vienent chantant et font caroles
Si granz qu'onques as maieroles
Ne veïstes greignors; devant
Vienent li chevalier corant
Sor les chevaus isneaus et forz.
De lor chevaus n'est il pas torz
S'il estoient plus bel que pro,
Car ne vont pas sovent en fro.
Einsi vienent. Quant Meraugis
Les voit, si dit: "Or m'est avis
Que cist vienent encontre nos."
"Beaus sire, encor ne savez vos
Que ce sera?" - "Dame, je non;
Mes en joie n'a se bien non.
Et por itant mieuz me plest ore
Page112
Qu'orainz, si fera il encore;
Que je n'aim riens tant come joie!"
"Deus nos en doint joïr que j'oie
Por quoi il sont si esjoï!"
Fet cele qui pas n'en joï.-
Joï? - Non voir, ainz en ot ire.
Lors encontrerent sanz plus dire
Ceus qui vindrent sor les chevaus.
Meliadus li seneschaus
Salue Meraugis avant.
Lors li vienent tuit au devant,
Et tuit le saluent ensemble
Et il eus et a eus s'assemble.
Einsi se metent el retor,
Et li pueples li vient entor,
Qui l'esgardent com a merveille.
Se cist parole, cist conseille
A cel autre, et cil le regarde;
Mes Meraugis ne se prent garde
De quan qu'il dïent, fors itant
Entent par hores en alant
Qu'il conseilloient dui et dui:
"Cist n'est mie mains granz de lui."
Itant entent et noient plus.
Meraugis et Meliadus
Li seneschaus de la cité
Page113
Chevauchent tant qu'il sont entré
folio114c
Dedenz la vile, a tant s'en vont
Droit a la mer et tant qu'il sont
Sor la marine descendu.
Adonc n'i ot plus atendu:
Il troverent la nef au port.
Meliadus dit cest recort
A Meraugis: "Beaus sire, entrez
En ceste nef et si passez
En cele isle." - "Je non ferai." -
"Por quoi?" - "Par foi, je ne voudrai." -
"Si ferez!" - "Non ferai, par foi!" -
"Si passerez!" - "Et je por quoi?" -
"Por ce que fere le covient.
C'est costume que nus ne vient
Par ci que passer n'i coviegne."
Dit Meraugis: "Se biens me viegne, 
Ceste costume vueil oster."
"Ainz vos i covient a passer
Par force." Lors dit Meraugis:
"Traiiez vos sus! Sui je donc pris?"
L'espee tret et dit: "Sachiez,
Ja i avroit menbres trenchiez
S'uns s'en movoit! Soiiez tuit coi!
Se je ne sai ainçois por quoi,
Ja por nului n'i passerai."
Page114
"Ferez?" - "Je non!" - "Je vos dirai.
Vos veez bien cele tor la
En mi cele isle; dedenz a
Un hardi chevalier, o lui
Une dame a, einsi sont dui;
.II. puceles et .I. serjant
I a por eus servir; itant
Sont en l'isle, n'en i a plus.
Se vos poez fere conclus
Le chevalier qui vos atent,
Itant sachiez certainement,
La dame et li chasteaus iert vostre;
Et s'il vos vaint, vos serez nostre
A fere quan que nos plera.
Cez dames qui nos sievent la
Ne chantent, ce sachiez sanz faille,
Fors por joie de la bataille
Dont sont liees et desirant."
Et cil qui riens ne vet querant
Se jostes et meslees non,
Dit el refret de la chançon:
folio114d
"Or dou chanter totes et tuit!
C'est li refrez; s'il ne s'en fuit,
La joste avra certainement."
Lors chantent destraveement
Page115
Et gros et gresle et bas et haut
De joie qui pas ne lor faut.
Meraugis, a cui mout plesoit
La bataille, regarde et voit
Que li chevaliers de la tor
Estoit issuz a riche ator
En l'isle et par cele isle ala.
Dit Meraugis: "Je voi ja la
Le chevalier, or ça la nef!"
Li marinier corent au tref
Et siglent tant qu'il sont venu
En l'isle; quant en l'isle fu
Meraugis, sempres remonta
Sor son cheval; lors s'en ala
La nef arriere, et Meraugis
S'eslesse et vient en mi le vis
Au chevalier qui l'atendoit.
Et li chevaliers qui n'estoit
Vilains n'enuieus ne mauvés,
S'arresta et soffri adés
Tant qu'a loisir fu atornez
Meraugis, aprés ont tornez
Les frains et hurtent les chevaus.
Mout est chascuns preuz et vassaus.
Il fierent des lances quarrees
Si que les lances sont passees
Par mi les escuz, et les fers
Page116
Hurtent es piz sor les haubers
Si par force - mes pas n'i entrent -
Que li cuer lor duelent et mentent;
Des cous dont li poitrail sont rot
Cengles trenchent, despiecent tot,
Les frains guerpissent, si s'en vont
A terre, si bien s'entresont
Feru que ne veïstes mieuz.
Dou cheoir des cous ont les ieuz
Troblez si qu'il ne voient gote.
Iluec jut chascuns sor son cote
Une piece, non pas lonc tens.
Quant il revienent en lor sens,
Si s'esmerveillent et lor semble
Que la tor dance et l'isle tremble. -
folio115a
Por quoi? - Des cous sont estoné.
Or cuident que il ait toné,
Ne se sevent au quel tenir,
Fors tant de l'estor maintenir
S'entremetent; lors s'entrevont
Espees tretes, et si ont
Les escuz sor les testes mis.
N'est pas li uns a l'autre amis,
Page117
Ainz s'entrassaillent. Bien le voient
Cil de la cité qui n'avoient
Onques mes tel joste veüe.
De la joste ont grant joie eüe,
Que mout lor plest; mes qui qu'en rie,
Lidoine ne s'en joe mie,
Non, ainz li dieut li cuers el ventre
De paor, et tant en i entre
Por la joste qu'ele a veüe,
Que s'oïe en devient veüe. -
Devient? Coment? Donc n'ot el gote? -
Non, s'oïe et sa force tote
O la paor qui si l'a pointe,
Et toz ses sens en une pointe
Se fiert es ieuz por esgarder
Celui qui ne se puet garder
Qu'el ne soit dolente por lui.
Einsi se combatent li dui
Chevalier qui sont pié a pié
En l'isle et tant "fiers tu, fier gié!"
Se mainent as espees nues
Qu'il font des heaumes vers les nues
Voler le feu que li solaus
En devint indes et vermaus. -
Por quoi? - Quant li solaus assemble
Page118
Au feu des heaumes, de loing semble
Que li heaume soient espris
De feu grizois. Bien l'ont apris
Le ferir, voire, mieuz que nus!
Iteus .XL. assauz ou plus
S'entrassaillent et tant se sont
Entrassailli en fin qu'il n'ont
Escu ne heaume a despecier.
Et quant il sont tel chevalier
Et il sont desarmé andui,
Que doit que cist n'ocist cestui? -
Que doit? Ce puet savoir .I. fous.
S'il ferissent ausi bons cous
folio115b
Com il firent au comencier,
Et lor testes fussent d'acier,
N'i eüst li plus forz duree.
Mes or torne a chascun l'espee
Au ferir et vole des mains;
Car tant se dieut cil qui'n a mains
Que bien se puet fere a itant.
Tot en pes sont en lor estant.
Einsi dura, com je vos di,
La bataille jusqu'a midi.
Aprés, quant midis fu passez,
Li chevaliers s'est porpensez:
Page119
A Meraugis vient, si l'assaut.
Meraugis qui encontre saut
Se desfent, mes cil le tient pres.
Voire, mieuz qu'il ne fist hui mes
L'assaut et greignors cous li done.
Meraugis qui des cous estone
S'esloigne et dit: "Or ne sai gié
Joer, li dé me sont changié;
Car je disoie et di encore
Que cist chevaliers estoit ore
Recreüz d'armes et atainz,
Mes trop li sont d'ore a orainz
Si coup changié outreement."
Et li chevaliers erraument
Revient et joint l'escu au cote.
Meraugis qui forment le dote
S'est esloigniez et si li dit:
"Di moi, vassaus, se Deus t'aït,
Ton non." - "Veus tu que jel te die?" -
"Oïl." - "Se Deus te beneïe,
Jel te dirai: Gauvains ai non.
Einsi me suelent li Breton
Apeler." Lors dit Meraugis:
"Coment? Gauvains, li miens amis,
Page120
Estes vos ce?" - "Oïl, par foi,
Gauvains sui je. Redites moi
Coment vos estes apelez."
"Meraugis sui de Portlesguez,
Vostre amis qui de vostre terre
Mui de la cort et por vos querre
Des Noël, mes la Deu merci,
Mout sui liez quant je vos ai ci
Trové; que toz li monz disoit
Que mes sire Gauvains estoit
folio115c
Perduz. La bele compaignie
Que li rois a, ne vostre amie
Ne vos cuident ja mes veoir."
"Non feront il! Sachiez de voir,
Ja mes li rois ne me verra!"
"Avoi! beaus sire, si fera,
Cest dit ne tieng je mie a sen.
Je me rent pris, alon nos en!
Passon outre, vez la navie."
"Meraugis, ice n'i a mie!" -
"Coment donques?" - "Par force estuet
Que cil de nos .II. qui plus puet
Ocie l'autre. Il est einsi
Qu'onques de ceste isle n'issi
Chevaliers nus, ja n'en istras." -
"Por quoi?" - "Par foi, tu ne porras,
Page121
Si te dirai reson por quoi:
Voiz tu la cele que je voi
As fenestres de cele tor?
C'est une dame, ci entor
N'a plus bele que t'en devis.
Cele cité et cist païs
Est toz suens; mes jadis avint
Qu'uns chevaliers mout hardiz vint
A li, si la requist d'amors.
Einsi comença en decors
Qu'ele l'ama et fu s'espose.
Puis avint qu'ele fu jalose
De lui et tant le veut amer
Qu'en ceste isle, por lui garder,
Fist fere cest herbergement.
Il i entra; mout longuement
I sejorna avuec s'amie,
Et quant il vout, il ne pot mie
Retorner, non, co fu noienz." -
"Por quoi?" - "Ma dame de laienz
Comanda a ses genz de la
Que nus ne fust qui venist ça
Por riens, s'ele nel comandast,
Et plus, que ja mes ne passast
Nus chevaliers par mi sa terre,
Qui ne venist ça por conquerre
Page122
Le pris contre son champïon.
Einsi, bien vousissent ou non,
I passerent maint chevalier
Puis jooient as cous trenchier
folio115d
Tant que par force les vaincoit
Li chevaliers qui mout estoit
Fiers et hardiz et combatanz.
Ceste vie mena .VII. anz.
Mout en ocist tant que de moi
Avint einsi come de toi
Est avenu, que je ving ça.
Et li chevaliers comença
La bataille mout egrement
Vers moi, et je mout fierement
Le reçui au mieuz que je poi.
Et en la fin tant le sorpoi
Que je l'ocis, mes tel anui
En ai que maugré mien por lui
Ai toz jorz cest chastel gardé.
Einsi a ma dame esgardé
Que j'i serai tant que plus forz
M'ocie, et quant je serai morz,
Si refera sa garde ci.
Se tu me vains ou je t'oci,
Coment qu'il aut, c'est li usages,
Page123
Toz jorz remaint li uns en gages
Tant que plus forz de lui revient.
Einsi par force te covient
Combatre a moi, je n'i voi plus;
Mes se tu en viens au desus
Et que ma force soit dou mains,
Tu seras mestre chastelains
De ceste tor tote ta vie."
"De ce n'ai je pas grant envie,"
Dit Meraugis, "ja n'en serai
Chastelains, non; car je ne sai
Chastel qui tant face a haïr.
Mes quant nus n'ose ça venir,
Qui vos donc donc a mangier?"
"Ce ne fet mie a encerchier.
Assez est, que trop en avon
De toz les mes que nos savon
Dire de boche et deviser." -
"Coment?" - "Toz jorz ainz le disner
Chascun matin ist de lasus
Ma dame, et quant ele est çajus,
La nef assene et ele vient.
Et lors de quan que nos covient
Demande et dit qu'en li aport	
Et se j'aloie vers le port
Page124
folio116a
Quant cele nef est arrivee,
El s'en iroit voile levee;
Que ja au port ne m'atendroit."
"Por quoi?" - "Ma dame cuideroit,
Se j'estoie enz et je pooie,
Que ja mes ça ne revendroie.
Einsi me garde et me tient pres
Que ja nul jor ne loing ne pres
N'en partirai; s'en ai tel dueil
Que, quant je pens a ce mon vueil,
Je voudroie que ci venist
Foudre, orage qui m'oceïst.
N'ai je reson?" -"Oïl." -"Je voi
Que tu es ci venuz por moi,
Et si covient que je t'ocie.
Deus, que ferai? Tant he ma vie
Et aim ma mort, se je pooie
l'on cors sauver, je m'ocirroie
De m'espee sanz plus atendre.
Mes se la mort me venoit prendre
Orendroit, ja por ce n'istroies
De ci, mes toz jorz garderoies
L'isle sanz joie et sanz deport
Tot ton vivant jusqu’a la mort.
Por ce m'esmai que je ne sai
Que dire." -"Je vos en dirai
Page125
folio116b
Le mieuz." - "Meraugis, vos coment?" -
"Mout bien selonc ce que j'entent.
Se vos volez croire et ovrer
A mon los, je vos cuit geter
Do ceste isle; ja n'i morrez."
"Je si ferai." -"Quel la ferez?" -
"Ne sai que plus vos en deïsse;
Mes n'est conseil, que n'en feïsse
Un sol que l'en m’osast nomer,
Neïs de saillir en la mer
Se vos l'esgardez por mon bien."
"De cest conseil ne lo je rien,
Nos le feron tot autrement."
"Or de par Deu, dites coment."
"Jusqu’au vespre nos combatron,
En la fin nos entrabatron
Joste la mer en cel val la
Que bien le verront cil de la
Et la dame qui est Iasus.
Aprés ne me desfendrai plus,
La me gerrai et vos ferrez
Sor moi et grant semblant ferez
Do moi ocirre outreement
Et por mieuz decevoir la gent
Prendrez mon heaume et osterez
Page126
De ma teste, sel geterez
En la mer voiant tot le mont:
Et par itant tu it cuideront
Que vos m'aiiez de vostre espee
Ocis et la teste coupee.
Aprés ice, quant vos l’avrez
Einsi fet, lors vos en irez
En cele tor. Je remaindrai
Por mort et itant i serai
Qu'il sera nuit, et erraument
Que je verrai l'anuitement,
J'irai a vos, si penseron
De noz cors tant qu'aillors seron."
Dit mes sire Gauvains: "Par foi,
Cest conseil lo je et otroi,
Que mout me plest." Lors s'entrevont
Ensemble et tot einsi le font
Com il l'avoient devisé.
De mainte part sont avisé
Et dïent que vaincuz estoit
Meraugis. Quant Lidoine voit
Cele merveille, ele que fist?
Ele se fert maudist
La terre qui son cors sostient,
Ja se noiast, mes on la tient
Page127
Par force. Que vos en diroie?
Si grant dueil fet que n'en savroie 
La disme dire nc retrere.
Je ai veü maint grant dueil fere, 
Mes n'i a pas comparoison;
Que nus dieus n'est se joie non
Envers cest dueil qu’ele demaine,
Tant qu'a un suen manoir la maine
Une pucele, Amice ot non.
N'ot pas d'iluec a sa meson
Plus de .iiii. lieues, non tant.
Einsi toz jorz reconfortant
L'en maine jusqu'a son hostel.
La descendent et si l'ot tel
Com l'en li pot plus joiant fere.
Mes mout empire lor afere,
Que Lidoine regrete et plore
Meraugis; et quant vient a l'ore,
folio116c
Si saut et despiece son vis
Et crie: "Harou, Meraugis"
Plus de .c. foiz tôt pres a pres,
"Et Deus, quant le verrai je mes?
Ne sai, je n'i voi nul confort."
Meraugis fu lessiez por mort
Page128
En mi l'isle, si se leva,
A la tor vint et si trova 
La dame et sa mesniee o li.
Un petit est avant sailli,	
Devant la table s'arresta.	
La dame qui le regarda
Ot paor, si saut de la table.
Plus de .vii. foiz por le dëable
Se seigne et crie: "Deu merci,
Qui est ce la?" -"Je qui sui ci
Venuz veoir la contenance.
Ja i morrez, c'est sanz dotance,
Se mot dites!" Lors les assemble.
En une chambre, ce me semble,
Les enferma desoz la clef.
La parolent, mes c’est soëf;
Que Meraugis lor dit et jure,
Se por crïer par aventure	
Muevent les boches no les denz,
Il metra ja le feu dedenz.
Einsi sont celes enfermées.
Aprés a ses armes ostees
Li chevaliers, mes se li plot,
Assez manja; qu'assez en ot.
Mout plot a mon seignor Gauvain;
Page129
Couchier se vont et l’endemain
Se leverent li chevalier.
Il n'alerent pas au mostier,
Non, qu'en l’isle n'eu avoît point.
Or escoutez si cortois point:
Meraugis esgarda et fist -
Et que fist il? - Par foi, il prist
Trestote la robe a la dame
Et lors dou tot com une fame 
Se vest et lace et empopine.
Plus acesmez qu'une popine
Descent aval de cel chastel,
S'espee desoz son mantel.
Que vos diroie? Au havre vint
Einsi vestuz; mout li avint,
folio116d
Car il estoit bien fez et genz,
De l'autre part virent les genz 
Meraugis qui par l'isle aloit 
Et de sa main les assenoit
Einsi com la dame sieut fere.
Ne se gardent de cel afere,
Lor dame cuident que ce soit:
A la nef vont, sempres tot droit
Vienent siglant de l'autre part.
Li mariniers qui fu soi quart
Page130
Arrive en l'isle, et Meraugis
Qui ot devant son conseil pris
Saut en la nef de plain eslés.
Si semble que totes les es
De la nef froissent et estendent,
Et cil qui au marchier entendent
S'aperçurent et si tremblerent
De paor de lui, si semblerent
Qu'il fussent pris; si erent il.
Desoz le mantel a porfil
Tret Meraugis l'espee nue
Et dit: "Vostre dame est venue!" -
"Ou est?" -"Vez la ci en ma main!"
Por li mostrer abat son frain 
Et dit as mariniers: "Par ma'ame,
Ceste espee, c'est vostre dame
Dont vos avrez dampnatïon.
Ja mourez sanz confessïon	
Se ne fetes ma volonté;
Et si vos di par vérité:
Se vos le fetes, vos avrez
Assez; ja mes ne me savrez
Riens demander que ne vos doigne."
Page131
Et cil qui voient la besoigne,
De riens nule nel contredïent.-	
Por quoi? - Il vuelent mieuz, ce dïent,
Assez vivre et avoir adés
Que morir d'armes desconfés.
Il dïent: "Sire, nos feron
Vostre bon, ja ne desdiron	
Riens qui vos plese." - "Est il einsi?"- 
"Oïl." - "Donc m'esloigniez de ci,
Si me menez par ça entor
Einsi que nos aion la tor	
Entre la nef et la cité."	
Cil qui vuelent estre aquité
folio117a
De la mort, vers la tor s'en vienent.
La s'arrestent et tant se tienent
Que mes sire Gauvains descent
Dedenz la nef, lors furent cent.
Lor armes ont; ainz qu'il s'esmuevent
Dïent as mariniers, s'il truevent
Page132
Terre nul lieu la entor pres,
Que ja mar en iront aprés,
Mes au plus pres les metent fors.
Et cil qui se dotent des cors
Tremblent et dïent qu'il prendront
Terre au plus tost que il porront.
Donc n'i ot plus, au sigler vindrent.
Je ne dirai pas que devindrent
Les dames, non, car je ne puis.-
Por quoi? - Par foi, je n'i fui puis,
Ne mes sire Gauvains n'i fu.
Einsi siglent et ont coru
Sor la coste en la basse mer;
Qu'il ne voudrent pas trespasser
La mer, ainçois ont acostee
La terre et tant qu'il ont passee
La mer et trestot le païs.
Mout ont erré, ce m'est avis,
Et tant qu'il ont terre encontree.-
Quel terre? — Ce fu la contree
De Handitou. — Oui la tenoit? —
Li cuens Gladoains qui estoit
Sires et mout ot terre aillors.
Li marinier pristrent lor cors
Por arriver a Handitou,
folio117b
Page133
Mes trop se hasterent d'un pou
A l'arriver. - Voire, coment? -
Il entrerent si durement
El havre que la nef sailli
Sor une roche, lors croissi
Et despeça en .II. moitiez.
Que puet chaloir? Sains et hetiez
Issi chascuns de la nef fors.
Li cuens Gladoains qui fu lors
A Handitou s'en avala
Droit a la mer. Quant il vint la,
Les chevaliers vit, ses conut. -
Et lors que fist?- Il acorut
Vers eus, ses salue et acole.
Come prodom de sa parole	
folio117b
Lor abandone quan qu'il a.
Mout les conjot, grant joie on a.	
Lors les mena en son recet	
Quant Meraugis s'arreste et fet
.I. dueil. - Por quoi? - C'est por s'amie.
"Qu'est ce?" fet il, "ou est ma vie? - 
Ou est? Coment l'ai je lessiee? -
Oïl, par tant m'est esloigniee. 
Page134
Par tant? Ai je la donc perdue? -
Oïl." - Lors se fiert et se tue.
Se s'amie fist dueil por lui,
Ce fu noienz envers cestui.
Non! Qu'en diroie? Ce n'avint.
Mes sire Gauvains qui le tint
Et tuit li autre le confortent.
Einsi com en travers l'en portent
En .I. palés lasus amont.
Li cuens li plus cortois clou mont
Les herberja la nuit si bien
Dou tot en tot qu'il n'i faut rien
Que nus ne puist penser ne dire.
Mes Meraugis qui fu plains d'ire,
Qui qu'en rie, n'a pas bon tens:
Einsi com s'il fust fors dou sens
Regrete s'amie et complaint.
Tant se demente et tant se plaint
La nuit que mes sire Gauvains
En est si corrociez et plains
De mautalent, por poi n'errage,
Et dit: "Vos fetes grant outrage
Et grant anui de tel dueil fere."
Page135
Come par force le font tere
La nuit, mes autre gieu n'en ont.
Aprés mangier couchier se vont
Li chevalier eneslepas.
Meraugis qui ne dormi pas
Leva matin, tuit sont levé.
Aprés ce, quant il ont lavé,
Au mostier vont, messe ont oïe.
Meraugis qui n'oblia mie
Lidoine, s'atorna d'errer;
A mon seignor Gauvain parler
Vint et li dist: "Dites moi, sire,
Orrez vos ce que voudrai dire?
Je vueil errer, ja mes n'a vrai
Joie ne ne sejornerai
Devant ce que j'aie trovee
M'amie; c'est chose provee
folio117c
Qu'el cuide que je soie ocis."
"C'est voirs! Jel sai bien, Meraugis,
Que par moi vos est avenue
Ceste ire, et par vostre venue
Sui je fors de la dolerose
Prison qui tant par ert hontose
Que nus n'en doit avoir envie.
Qu'en diroie? Je tieng ma vie
Page136
De vos, et bien sachiez sanz dote
Que m'aide et ma force tote
Est vostre, bien l'avez conquise.
M'aventure que j'ai emprise
De l'espee me covient querre.
Se je retornoie en ma terre
Sanz li, m'onor seroit esteinte.
Ja mes n'irai, ainz avrai ceinte
L'espee as renges de merveilles.
La irai, Deus, car m'en conseilles!
Et vos irez de l'autre part
Querre Lidoine. Ici depart
La compaignie de nos .II.;
Mes d'itant vos chasti: li deus
N'est mie bons a maintenir.
Bien sachiez: se je puis venir
En lieu ou vostre amie soit,
Ja sor moi ne vos covendroit
Estre por garder vostre honor;
Et se je vieng ainçois .I. jor
A la cort que vos i veigniez,
Itant vueil je que vos sachiez
Que ja une nuit n'i gerrai." -
"Que ferez donques?" - "Je movrai
Por vos querre sanz plus atendre;
Et se je puis par home aprendre
Page137
folio117d
Que vos aiiez de moi besoig,
Ou que ce soit, ja n'iert si loing
Que je n'aille metre mon cors
Por vos." - Meraugis respont lors:
"Vostre merci! Et je creant:
Se je a la cort repere avant
Que vos, une nuit i gerrai
Sanz plus, et l'endemain movrai
Por vos querre tant que trové
Vos aie!" - Einsi l'ont creanté.
Lors n'i ot plus, au conte vont,
Congié prennent et mout li ont
Proiié des .IIII. mariniers.
Et li cuens qui fist volentiers
Lor proiiere, respont itant
Des mariniers: "Ja mar avant
Iront, je lor donrai assez."
Toz les retint et a fievez
Por lor amor; et en aprés
As chevaliers qu'il aime adés
Fet venir .II. chevaus de pris,
Si lor done, et cil les ont pris
Qui l'en mercïent, puis s'armerent.
Au departir, quant il monterent,
S'entresaluent et comandent
PageP138
A Deu; or ont quan qu'il demandent
[De par armes. A tant s'en partent.
Chascuns s'en vet, einsi departent.] 
Or vet chascuns toz sous sa voie.
 De Meraugis, se je savoie,
Vos diroie com il avint.
Il oirre tant qu'en maint lieu vint, -
Que demande? - La cité quiert
Sanz non; par tot cerche et enquiert
A la cité sanz non la voie.
Cui chaut, quant nus ne l'en avoie
Qui de boche sache parler,
Ne nus ne li ot demander
La voie a la cité sanz non,
Qui s'en face se gaber non?
Que vos diroie? Assez puet querre
Qui quiert Paris en Engleterre.
Einsi a Meraugis ovré
Toz jorz, et noient n'a trové.
Il jure et maudit tot le mont.
Par mautalent regarde amont
Et dit - ja mes n'orrez autel -:
"Deus, as tu riens en ton chatel
Page139
Dont tu conforter me peüsses? -
Nenil! - Si as! Deus, bien deüsses
Moi ocirre on avoir merci
De moi! - Coment? Ne sui je ci 
Toz sous? Quel merci vueil avoir? - 
Paradis. - Qu'ai je dit? Ja voir
Nel lerai! - Por quoi? - Donc n'i ont
Quan qu'il vuelent cil qui i sont? -
Oïl! - Donc fusse je orendroit
Dedenz; ou Lidoine vendroit,
folio118a
Ou tuit cil qui dedenz seroient
N'avroient pas quan qu'il voudroient. -
N'avroient? - Non, ce m'est avis,
Sanz li n'a Deus nul paradis
Qui me plese. - Qui donc? - M'amie
Je vueil. Cui chaut? Deus ne veut mie
Que je l'aie, ainz veut qu'autre l'ait.
Bien la doit perdre qui la let!
Je l'ai lessiee." Lors tressaut
D'angoisse, et avuec ce l'assaut
Dieus et amor; ice le toche
Page140
Au cuer. Li cuers li clot la boche,
Transglot le dueil, mes mout li grieve.
Aprés quant cist dieus li escrieve,
Si sospire et de plain eslés
S'eslesse, et quant il a adés
Coru tote sa randonee,
Si ra au dueil bone donee.
Einsi est vuidiez en alant
De dueil, et itel mautalant
A il le jor .X. foiz ou .XX.
Tant qu'orendroites li avint
A l'entree d'un plesseïs
La ou Marez d'Escaldeïs
Tot le matin estoit en guet
Et voit que li chevaliers fet
Come cil qui estoit en sore.
Lors dit Marez: "Cist m'acort sore."
II s'eslesse, por joster muet.
Meraugis qui li dieus esmuet
Ne se garde, mes toz jorz point.
Et Marez qui encontre point
Page141
Besse sa lance, si li done
Sor l'escu tel coup qui resone.
Meraugis revient qui s'esfroie,
Lors se tient et Marez peçoie
Sa lance, outre s'en est passez.
Meraugis qui s'est porpensez
Retorne a lui et tret l'espee,
Et Marez vient a la meslee,
Si comencent une bataille
Ausi com par ci le me taille.
Onques mes plus fiere ne vi,
Tant que par devant eus issi
De la forest .I. chevaliers
Qui mout oceïst volentiers
folio118b
Meraugis, s'il le coneüst,
Et Meraugis lui, s'il peüst. -
Qui est il? - C’est l'Outredotez,
Li crueus, li desmesurez
Qui tant avra Meraugis quis;
Mes il n'a mie Meraugis
Aperceü, si s'en passa
Outre. Meraugis qui pensa
A lui, a dit: "Se je peüsse
De ci partir, ancui seüsse
Li queus de nos fust li plus forz."
Marez respont: "Se j'ere morz,
Page142
Siuroies le?" - "Oïl." - "Por quoi?" -
"Por ce que jel he plus que toi,
Et si ai droit; qu'il m'a mesfet."
Marez respont: "Quant il t'a fet
Tant que guerre a entre vos .II.
Je te doing trieves, se tu veus,
Par covenant qu'il soit einsi:
Qu'el premier lieu aillors que ci
Que nos nos entretroveron,
Ja autres armes n'i querron
Fors celes que avron en l'ore,
Et lors nos entrecorron sore
Come dui anemi de mort. 
Entent i bien: Par cest recort
Tu n'as nul lieu trieves de moi,
Neïs se c'iert en cort de roi.
Par devant toz je t'assaudroie!"
"Et je de toi me desfendroie,"
Fet Meraugis, "tot pié estant."
"Or soit einsi, je le creant!"
Ce dit Marez qui s’en retorne
Au bois, et Meraugis s'en torne
Aprés le chevalier qu'il het.
Les nois sont granz, par itant set
Quel part il vet, car il le trace
Toz jorz et toz jorz le menace
Page143
A ocirre s'il l'aconsieut.
Oue vos diroie? Tant le sieut
Qu'il vient par devant .I. chastel.
Li mur desus et li quarrel
Erent de marbre tot entor.
Tot maintenant jusqu'a la tor
Vint Meraugis qui s'arresta
Devant la porte et esgarda
folio118c
Par mi la porte, et tant qu'il voit
Qu'en mi lieu de cel baille avoit
Un pin si vert com en esté.
Se li pins fu de grant beauté,
Ce ne fet mie a demander.
Entor le pin por caroler
Avoit puceles qui chantoient.
As caroles qu'eles fesoient
N'avoit qu'un tot sol chevalier.
Iluec por la joie esforcier
Chantoit avant. - Et qui ert il? -
Li Outredotez, et c'est cil
Que Meraugis a tant seü.
Et quant Meraugis a veü
Qu'il carole, la teste armee,
L'escu au col et a l'espee
Ceinte come por lui desfendre,
Si dit: "Orendroit sanz atendre
Page144
Sera Laquis de Lampagrés
Vengiez!" Lors cort de grant eslés
Droit au chevalier, si li crie:
"Fui, chevaliers, ne chante mie!
Je te desfi, tu morras ja!"	 
Mout li est tost ce qu'il pensa
Changié. - Coment? - Einsi a droit,
Qu'autel talent com il avoit
Orainz, quant il estoit la fors,
De ferir de sa lance el cors
Le chevalier que il haoit,
Autel talent a orendroit
De caroler; car il oblie
Tot ce defors, neïs s'amie.
Einsi li coviert oblïer
S'amie; lors vet caroler
L'escu au col et chante avant.
Li autre qui chantoit devant
Guerpi la tresche, si monta
Sor son cheval, lors s'en ala
Fois de la porte. Quant il fu
La fors, si a Ieenz veü
Son anemi, sel conut bien
Par les armes. Soz ciel n'a rien
Qu'il haïst autant come lui.
Page145
"Qu'est ce?" fet il, "je voi celui
Oui geta mon escu a terre.
Je l'ai trové, si ne l'os querre
folio118d
La ou jel voi! Deus, que ferai?
Se je vois la, je chanterai
A la carole de rechief.
Tot autre gieu fors cest meschief
Feroie je." Lors le menace
Et dit que ja mes de la place
Ouil estoit ne se movra
Devant que Meraugis istra
Fors dou chastel, mes c'est noienz,
Que Meraugis qui est laienz
N'entent de riens a sa parole.
Tant chante avant et tant carole
Que l'Outredotez qui ne dote
Chevalier, n'i entent mes gote,
Ainz s'en vet, car la faim l'en chace.
Ja mes jor ne guerpist la place
Por home, se la faim ne fust.
Nus hom ne puet vivre de fust.
Por ce s'en vet l'Outredotez,
Mes ne s'est pas trop demorez,
Par tens revient et si aporte
Son tref, iluec devant la porte
Page146
Le tent por guetier Meraugis	
Einsi fetement l'a assis.
Or dit que ja mes ne movra
Son tref devant que il avra
Par force vengiee sa honte.
De quoi vos feroie lonc conte?
Meraugis fet mout l'envoisié,
Il chante avant et fiert don pié.
En meillor point nel puis je mie
 Lessier. Or vos vueil de s'amie
Aprendre que ele devint.
Bien avez oï qu'ele vint
La premiere nuit chiez Amice.
Lidoine qui ne fit pas nice
Promist et fist tant vers s'ostesse
Que cele li fist la promesse
D'aler o li en sa contree.
No fist pas longue demoree
Avuec Amice, ainz s'en parti
Au matin. Or s'en vont einsi,
Longuement chevauchent ensemble.
Lidoine erre tant, ce me semble,
Qu'ele fu pres de sa contree.
Lors l'a par pechié encontree
Page147
folio119a
Uns chevaliers, Belchis li Lois,
Qui a le front plus dur que bois.
C'est li plus lez qu'onques nature
Feïst; onques mes creature
Ne fu qui tant vousist mal fere.
Onques prodom ne li pot plere,
Mes tuit li mal sont si accointe.
Belchis avoit .I. nes a pointe
Trop lonc et si fu anuieus.
Li Lois qui s'entrefiert des ieuz
Fu granz et durs et ses et megres;
Mes mout estoit hardiz et egres
En batailles et en estors.
Riches chasteaus et beles tors
Tint assez, pres de Cavalon.
Bien resembloit terre a baron
Sa terre. Tant a fet par tot
Qu'il n'a voisin qui ne le dot.
Quant Belchis choisi et conut
Lidoine, vers li acorut,
Si la salue et li dit: "Dame,
Bien soiiez venue, par m'ame!
Page148
Terre et avoir et quan que j'ai
Vos offre et vos herbergerai,
Se il vos plest, anuit mout bien.
Vostre peres ama le mien
Et j'amai lui." Quant Lidoine ot
Belchis qui dit que il amot
Son pere, si l'en mercia
De l'ostel et dit qu'ele ira
Por herbergier. Lors dit Belchis:
"Damoisele, de Meraugis
Me dites qu'il est devenuz."
"Sire," fet ele, "il est perduz
A mon oes." - "Et coment?" - "Einsi
Que jel lessai la ou jel vi
Ocirre." Quant Belchis l'entent,
Traïson qui en lui s'estent
Le fiert el cuer; car il pensa
Mal, dont honte li avendra
Ainçois qu'il muire. A tant s'en vont
Et chevauchent tant que il sont
Devant .I. chastel qui est suens.
Li chasteaus est riches et buens.
En mi le palés la amont
Descendent. Au descendre vont
Chevalier qui grant joie firent
Por la pucele que il virent
folio119b
Et conurent que ele estoit
Page149
Dou païs, et bien conoissoit
Ceus qui vindrent a son descendre.
Belchis qui fist les chevaus prendre
Les herberja mout richement;
Mes nus ne doit comencement
Prisier, dont la fin est mauvese.
Lidoine fu la nuit a ese,
Mes au matin, quant se leva,
A sa pucele comanda
Qu'en li feïst metre sa sele.
Si dit Belchis a la pucele:
"Pucele, d'errer est noienz!
Lidoine est dame de çaienz.
Puis qu'einsi est que Meraugis
Est morz, or sera ses amis
Mes fiz, li cortois Espinogres.
Onques el roiaume de Logres
Ne fu plus beaus vaslez norriz.
Ses oncles Melianz de Liz
Le garde et dit qu'il le fera
Si hautement com il devra
Chevalier a la Pentecoste."
Lidoine ot ce qui mout li coste,
Si dit: "Sire, s'einsi estoit
Qu'il vos pleüst, mout me pleroit
Cest mariage a compasser;
Car je ne me sai porpenser
Page150
D'ome qui autant me pleüst
Come vostre fiz, se il fust
Chevaliers et il li plesoit.
Bele aventure m'avendroit
Se vos et il le volïez.
Tant valez que bien tendrïez
Mes tenemenz, et neporquant
En mon païs m'estuet avant
Aler que je preigne seignor.
Ne fetes mie lonc sejor,
Mes mandez que vostre fiz soit
Noveaus chevaliers. S'il estoit
Chevaliers, par tens revendroie
En la marche, sel recevroie
A seignor et si seroit rois;
Mes aler m'en covient ainçois."
Belchis respont eneslepas:
"Lidoine, einsi n'ira il pas
folio119c
Dou tot a la vostre devise.
C'est por noient, vos estes prise,
Ja mes de ci ne vos movrez
Nul jor devant que vos avrez
Receü mon fiz a seignor
Et qu'il sera rois de l'onor
De Cavalon, et vos reïne."
Dit Lidoine: "Ceste sesine
Me plest mout! Quant il est einsi,
Or de par Deu! je serai ci
Page151
Tant com vostre plesir sera."
Ce respondi, mes el pensa.
Einsi fu cele retenue
Oui a mal hostel fu venue.
Ne set que fere, grant dueil a.
De corroz plore, einsi ala
Son dueil menant par le palés.
Quant ele voit Belchis l'auchés,
Si tremble de paor et dist
Ou'onques ne fu, ne Deus ne fist
Home ausi let, ne nus nel set.
"Voi," fet ele, "com Deus le het
De son cuer, et je l'ameroie?
Non ferai, voir, car je feroie
Encontre Deu se je l'amoë.
Por sol itant qu'il fet la moë
He je son fiz de tot mon cuer;
Que je n'ameroie a nul fuer
Ne lui ne riens qui de lui soit.
Que ferai donc? Par cui que soit
M'estuet mander Gorvain Cadruz,
S'il me secort, qu'il iert mes druz."
Son conseil a dit Amice:
"Amice, rose, douce espice,"
Fet Lidoine, "por Deu merci,
Ja mes ne partirai de ci
Se par vos non!" - "Par moi? Coment?"
Fet Amice, "certainement
Page152
Sachiez, se fere le pooie,
Volontiers vos cn geteroie,
Mes je ne puis." - "Si poez bien!"
Cele respont: "Soz ciel n'a rien
Que je ne face!" - "Donc estuet
Por moi edier, quant mieuz ne puet
Estre, que vos prenez congié
folio119d
Et dites, d'itant vos pri gié,
Qu'aler volez en vostre terre.
Si m'irez .I. chevalier querre
Oui mout m'aime, Gorvains a non.
Au chastel de Pantelïon
Est ses reperes. Dites li
La mort Meraugis et einsi
Coment Belchis li Lois m'a prise;
Et se il m'aime tant ne prise
Qu'il me vueille vers lui conquerre
Jel ferai seignor de ma terre
Presentement por guerroiier.
S'a force me puet desresnier,
Soe serai; et s'il ne puet,
Le roiaume qui de moi muet
Li doing et vueil que il soit suens;
Car se cist fet de moi ses buens,
Ja mes ne quier por nul avoir
Terre ne bien ne joie avoir.
Amice amie, or est en vos!
Dites moi Anchisés le Ros,
Page153
Mon seneschal, que je li mant
Come sa dame et li comant
Que Gorvain Cadruz a seignor
Reçoive le premerain jor
Que Gorvains li vendra requerre,
Et qu'il li aït de la guerre
A son pooir. S'einsi le fet,
Je l'amerai; ou entreset,
S'il nel fesoit, je le harroie.
Por enseigne, qu'il vos en croie,
Li porterez cest anel d'or.
Il l'achata de mon tresor,
Sel conoist bien; et par itant,
Je cuit, ainçois le mois issant
Orra Belchis autres noveles."
Cest conseil ont les damoiseles
Afermé, et Amice vet
Congié prendre et Belchis la let
Aler; que riens ne li demande.
Amice monte qui comande
Lidoine a Deu, a tant s'en part
Et s'achemine cele part
Ou el cuide Gorvain trover.
Tant se paine de tost aler
Qu'ele l'a trové come sage,
Si li raconte son message
folio120a
De par Lidoine quil salue.
Et quant Gorvain s a entendue
Page154
La damoisele, si ot joie
Mout grant; ja mes de riens qu'il oie
En cest siecle greignor n'avra,
Et dit que Belchis en avra
La meslee. Soz ciel n'a terre
Ou il n'alast pur li conquerre,
Por ce qu'il set qu'il li pleroit.
Einsi joianz com il estoit
Mande et semont toz ses amis.
Tuit li haut home dou païs
Vienent a Gorvain qui assemble
Grant gent tant qu'il en ot ensemble
.CCC. qui tuit sont haut baron.
Amice ala a Cavalon
Au seneschal a la pucele.
Et quant il oï la novele
De sa dame qui estoit prise,
Si blasme Belchis et desprise
Et dit que ja mes ne sera
Liez ne joianz, ainçois avra
Tel plet basti par quoi Belchis
Sera essilliez et fuïtis
De sa terre s'il ne li rent
Sa dame; et dit outreement
Qu'il fera quan qu'ele li mande:
Puis qu'einsi est qu'ele comande
Qu'en sa terre soit receüz
Gorvains, bien i soit il venuz;
il le recevra volentiers.
Page155
Lors mande a toz les chevaliers
Dou roiaume que tot einsi
Estoient vaincu et honi
So lor dame en prison lessoient.
Li chevalier qui mout amoient
Lor dame, entendirent l'afere
Que maugré li veut Belchis fere
De son fiz roi; mout lor greva
Et dïent tuit qu'il on avra
La guerre. A tant en est venuz.
Toz li païs est esmeiüz
Des noveles qu'il oënt dire.
A Cavalon a .I. concire
Assemblent tuit li haut baron.
Riens n'i truevent se guerre non
folio120b
En lor conseil; par tot manderent
Lor genz et es briés comanderent
Qu'en .VIII. jorz fussent tuit venu.
Le jor que li concires fu
Vint Gorvains Cadruz o granz genz.
Quant cil de la cité dedenz
Oïrent que Gorvain s venoit
A si grant gent com il avoit,
Mout furent lié, encontre alerent.
Li borjois qui lor dame amerent
Vindrent tuit fors de Cavalon.
A joie et a processïon
Eu Gorvains cel jor receüz
Si tost com il fu descenduz.
Page156
Et Anchisés li seneschaus
Qui mout estoit preuz et loiaus
Vient devant lui, si le sesist
De la terre a la dame et dist
Oianz toz qu'ele le comande.
Por bien fere ce qu'ele mande
Li abandone ses tresors.
Gorvains qui en fist trere fors
L'or et l'argent, l'a departi;
Onques povres ne s'en parti
Chevaliers qui en vousist prendre. 
Par tant lor fist Gorvains aprendre
Qu'il n'estoit pas vilains ne chiches,
Ainz dïent: "Toz nos a fet riches
Cist noveaus sire. Bien soit il
Venuz!" Einsi le loent cil
Por la largece qu'il i truevent.
Largece est teus que de li muevent
Li bien. Beauté, sens ne proece
Ne valent noient se largece
I faut; car largece enlumine
Proece; largece est mecine
Par quoi proece monte en haut.
Nus ne puet, se largece i faut,
Conquerre pris par son escu.
Largece qui tot a vaincu
A si ceus pris qu'il aiment tant
Gorvain Cadruz qu'onques autant
N'amerent seignor qu'il eüssent;
Page157
Car en cest point riens ne seüssent
De son plesir qui entreset,
S'il peüssent, ne fust tot fet.
folio120c
Einsi fu Gorvains, com je di,
Sires et de tot l'ont sesi,
Gorvains a par les chasteaus mis
Ses gardes, einsi a tot pris
Le roiaume et mis en sa main,
Et dit qu'il movra lendemain
De Cavalon o tot son ost.
Les noveles qui mout vont tost
Sont tant alees que Belchis
Oui mout fu crueus et eschis
Set cele muete et set por voir
Qu'il li covient la guerre avoir
Por Lidoine s'il ne la rent;
Mes se Belchis li Lois ne ment,
Mieux voudroit estre renoiiez
Ou ars ou ocis ou noiiez,
Que por eus toz en feïst rien.
Coment qu'il aut, ce dit il bien,
Lidoine ne rendra il pas.
N'est mie comenciee a gas
Ceste meslee, mes a certes.
Belchis, qui que restort les pertes,
Garnist ses marches et semont
Ses parenz qui grant joie font
De la meslee et de la guerre.
Tote est esmeüe la terre
Page158
Jusqu'a la mer par cel outrage.
Belchis fu mout de grant lignage
Et de hardi et de cruel.
Tuit si parent furent itel
Qu'onques amor ne pes n'amerent.
De son lignage s'assemblerent
.CCC., et plus i sont venu
Au chastel la ou Belchis fu.
Einsi fu Belchis de la guerre
Garniz. Gorvains li fist requerre
Qu'il li rendist sa damoisele.
Por ce qu'il ne vout, la novele
Li vint au matin que Gorvains
Li art sa terre. Lors fu plains
Li Lois de mautalent et d'ire.
Fors de son chastel sanz plus dire
S'en ist a grant pooir de gent
Et dit que por mil mars d'argent
Ne leroit qu'en l'ost ne se fiere.
Tuit si parent a sa baniere
Oirrent et tant ont chevauchié
Qu'a .I. aguet el bois trenchié
folio120d
Ont les premerains encontré,
Et vienent tuit desconraé
Ça .V., ça .X., ça .XX., ça mains.
Proie acueillent et les vilains
Page159
Tuënt et chacent par les plaignes.
Totes fremissent les montaignes
Des serjans et des chevaliers.
Devant les autres toz premiers
Vient Anchisés li seneschaus.
Tant ont coru que lor chevaus
Sont estanchié; de tant sont il
Meillor a desconfire, et cil
Quis atendent au guet lor saillent,
Lances bessiees les assaillent
Mout fierement. Quant Anchisés
Choisi lor gent qui fu si pres
Qu'il n'i a ne mes dou ferir,
Si dit que mieuz voudra morir
Que par eus soit li chans partiz.
Anchisés qui mout fu hardiz
S'arreste et assemble ses genz.
Entre chevaliers et sergenz
Ot bien .CCC. en son conroi.
Lors assemblent par grant desroi
Anchisés et Belchis li Lois.
A l'encontrer fu granz li frois
Des lances dont il s'entredonent
l'eus cous que il se desarçonent
Des chevaus, et par mi les piz
S'entredonent des fers bruniz
Si morteument qu'il s'entreversent.
Page160
En mi le champ teus .C. enversent
De cui les ames sont issues.
En l'estor des espees nues
Veïssiez maint coup departir
Et tous .C. de l'estor partir
Oui sont feru jusqu'as boëles.
s'entretrenchent les cerveles
hit les espaules jusqu'as flans.
Tant en trebuschent que li sans
Cort com .J. doiz aval les plains.
De braz, de testes et de mains
Jonche toz li païs entor.
Mout aclarïent en l'estor
La gent Anchisés et tant sont
Afebloiié que cil lor font
As espees guerpir les rens.
Ja mes venuz n'i ert a tens
folio121a
Gorvains qui vient por eus secorre.
Une lieue li covient corre
Ainçois qu'il soit a la meslee
Ou sa gent est si desmeslee
Qu'il s'en fuient ça I. ça .II.
Li Lois en prist, dont fu granz deus,
Teus .X. qui tuit sont de haut pris.
Avuec ceus a des autres pris
Tant com lui plot tot a son chois.
Mes or voit fors issir dou bois
Page161
La baniere Gorvain qui vient.
Dou pueple qui a lui se tient
N'est mie gieus, car tant i ot
Chevaliers que de loing semblot
Que toz li monz venist ensemble.
Tant i a gent que Belchis semble
Qu'onques mes tel pueple ne vit.
Mout redote Gorvain et dit
En fin qu'il ne l'atendra pas.
O son eschec plus que le pas
S'en vet, et quant cil de l'ost voient
Que il s'en vet, s'il nel convoient,
Ce dïent, ja mes n'avrant joie.
De l'ost se metent a la voie
Tel .CCCC. qui tuit le sevent,
Mes por noient; que tant ne sevent
Chacier que ja mes les ateignent.
Lor cheval chieent et esteignent
Par cez bruiieres, et Belchis
S'en vet qui bien set le païs
Par mi la forest et tant fuit
Qu'a Campadoine vient la nuit,
.I. suen chastel qui fu mout forz.
Gorvains Cadruz et ses esforz
Remest es plains de Hardecin.
Li chasteaus sist sor .I. chemin.
Page162
Iluec se loge, si assiet
Le blanc chastel qui trop bien siet.
Il n'ot plus bel en Engleterre.
Mout ot Belchis li Lois grant terre
Iluec entor, mes cil de l'ost
Li ont le païs assez tost
Essillié. Quant cil de la tor
Voient qu'il sont assis entor,
Si se garnissent dou desfendre.
Et Gorvains Cadruz por eus prendre
folio121b
Fist fere eschieles plus de .XX. .
Au matin des que li jorz vint
Les assaillent, et cil d'amont
Lor vienent as murs ou il ont
Lor eschieles eneslepas
Dreciees. Mout estoient bas
Li mur, et mout se desfendierent
Cil dedenz; mes tant s'esforcierent
Cil de l'ost qu'il monterent sus
Par tant lieus que n'i porent plus
El baille cil dedenz durer.
Par force lor covint monter
En la tor, et Gorvains demande
Le feu et es sales comande
Que l'en le mete; soz le vent
Le metent, et li feus s'i prent
A .I. palés devant la porte.
Page163
Si com li dëables l'en porte
Sailli dou palés en la tor,
Et ele cstoit hordee entor
De cloies et de heriçon.
Don hordeïs en la meson
Dedenz la tor sailli li feus.
C'est .I. tormenz qui mout est feus
Que riens ne puet a lui durer.
Ne le porent plus endurer
Cil dedenz, ainz metent lor cors
A bandon, si saillirent fors
Dou chastel par mi les fenestres.
Cous et espaules, braz et testes
Peçoiierent au saillir jus.
Cil furent pris, il n'i ot plus.
Lor tres destendent, lors s'esmuet
Gorvains Cadruz, et li oz muet
Droit au chastel de Campadoine.
En la riviere d'Autecoine
Corent et ardent tot entor.
Belchis li Lois fu en la tor
De Campadoine; quant il vit
Sa terre ardoir, sempres a dit
A ses parenz: "Montez, montez!"
De Campadoine en mi les prez
S'en issent tuit, prest de mal fere.
Belchis, cui que doic desplere,	
Dit qu'il ira lor genz veoir.
Page164
Por ce qu'il veut l'ost sorveoir
Issi dou bois en une angarde;
Mes onques ne se dona garde
folio121c
Devant que Gorvains li sailli
Dou bois ou il ot assailli
.I. chastelet que il ot pris.
Sor les bons coreors de pris
Lor acorent. Quant Belchis voit
 Gorvain Cadruz qui ja estoit
Entre lui et le bois a destre,
Por ce que autre ne puet estre
Li vient encontre, et la meslee
Comence; mes n'i ot duree
La gent Belchis: sempres tornerent
Les dos, et cil les atornerent
As espees mout ledement.
Quant li Lois vit certainement
Que sa puissance estoit outree,
Fuiant s'en vet lance levee
Devant et si parent aprés.
Cil de l'ost qui sievent de pres
En ont une merveille ocis;
Onques .I. sol n'en i ot pris,
Tot ocïent; einsi le font.
Par force de chevaus s'en vont
Cil qui ne mestrent en la place.
.IIII. lieues dura la chace
Ainz que li Lois peüst avoir
Recet; que il ne pot por voir
Page165
A Campadoine retorner.
Si ne fine d'esperoner
Devant ce qu'il vint a Monhaut,
Un suen chastel qui mout fu haut
Assis en .I. regort de mer.
De tant se puet Belchis vanter
Qu'il ne crient siege de nul home.
Se toz li empires de Rome
Estoit entor, n'avroit il garde;
Car la mer d'Escoce le garde
D'une part. Se fu bien seant
Par derriere, il n'ot par devant
Plus beau chastel en Engleterre.
Devant la porte devers terre
Avoit une riche trenchiee
Dont la falise estoit trenchiee
Plus de .C. toises en parfont.
Desus l'arriere, d'eve amont,
Avoit murs et torneles teles
Ou'en tot le mont n'avoit auteles.
folio121d
Monhaut, cest chastel que je di,
Avoit Belchis devant garni
De quan qu'il pot el mont avoir.
La fu li mieuz de son avoir,
La fu sa feme et sa mesniee
A sejor, la fu envoiiee
Lidoine qui par mesprison
Page166
Fu prise; la fu en prison
Mainz chevaliers preuz et cortois,
La fu Belchis outre son pois
Entrez por paor de morir.
Or voit la gent Gorvain venir,
Mes ne li chaut; car poi les dote.
Et Gorvains vient et sa gent tote,
Quis amaine devant Monhaut.
Mout le vit riche et fort et haut,
Sel dote mout a asseoir.
Mes por ce que il set de voir
Que Lidoine est lasus amont,
Dit que ja mes nul jor dou mont
N'en partira devant qu'il l'ait
Par force pris; tot son ost fet
Logier contreval la riviere.
Devers la mer, par de derriere,
N'i pooit il pas avenir.
Par devant fist sa gent venir.
Einsi fu en Monhaut assis
Li Lois qui ja ne sera pris
Por riens; mes de c'est il seürs
Qu'il n'a de terre fors des murs
Plain pié que Gorvains ne li ait
Essillié. Or fet son atret
Devant le chastel que il a
Assis. Par tot le mont manda
Engigneors, mout en i vint.
Page167
D'engins tant qu’onques ce n'avint
Lor fist fere; quant il les orent
Fez, au plus tost qu'il onques porent
Les drecent as murs, si assaillent.
Et cil qui furent dedenz saillent
Encontre, qui hardiement
Les reçoivent et mout sovent
Issent contr'eus fors dou chastel
Si qu'il lor portent le cembel
.III. foiz le jor jusques es tentes.
Cil de l'ost qui ont lor ententes
folio122a
A eus maufere, les encontrent
Si morteument qu'il s'entrafrontent
Et s'entrocïent et mehaignent.
.I. jor perdent, autre gaaignent
Cil dou chastel qui grant deport
Ont en ce que il ont le port
Des nes qui vont et qui revienent;
Que genz et vïandes lor vienent.
Einsi assaillent et desfendent. 
Cil ont assez ou il entendent.
Et Meraugis, que devint il?
Carole il encore? - Oïl,
Einsi com la matire conte.
Raous qui romance le conte
Trueve qu'onques n'en remua
De caroler, ainz carola
.X. semaines tant qu'il avint
Page168
Qu'uns autre chevaliers revint
Qui entra enz par aventure.
Li chasteaus ert de tel nature
Que toz jorz en i avoit .I.
Ilueques s'oblioit chascun
Tant que uns autre i revenoit.
Li chevaliers chante orendroit,
Pit Meraugis vint au destrier
Qui onques puis n'ot de mangier
Talent qu'il entra en la porte.
Lors monte et li chevaus l'en porte
Fors dou chastel; et quant il fu
La fors, si vit le tref tendu
Devant la porte, dont il ot
Mout grant merveille. Sempres ot
Le rossignol chanter et voit
L'erbe vert dont la flor estoit
Freschete, et li bois fu floriz.
Meraugis qui fu esbahiz
S'arreste et dit: "Deus, dont vien gié?
Sui enchantez ou ai songié?
Ne sai, par foi! Mes j'oi merveilles
Quant j'oi chanter a mes oreilles
Le rossignol: oci, oci!
Et orendroit que je fui ci
Firent les nois par cest païs
Plain pié d’espés; or m'est avis
Dou rossignol que j'oi chanter,
Page169
Qu'il le fet por moi enchanter. -
folio122b
Non fet! - Si fet, que que nus die.
Reson ne li aporte mie
Qu'il chant si tost, ce n'avint onques. -
Por quoi ne chanteroit il donques?
N'est il estez? - Non il, par foi! -
Que donc? - Yvers! - Yvers? Je voi
L'erbe si vert com en esté. -
Non est, la noif a ci esté,
Je l'i vi par tot que suivi. -
Par foi, a poi que je ne di
De moi que ce ne sui je mie. -	
Si sui! - Donc ne quier je m'amie?
Ne sui je Meraugis? - Oïl,
Ce sui je. - Mes ne sui pas cil
Qui orainz vit les nois? - Si sui!
Ce sui je qui en cest jor d'ui
Les vi. - Non fis, ce ne puet estre
Qu'aprés les nois peüst ci nestre
L'erbe si tost por nul pooir.
Ce que je dui orainz veoir
Fu fantosme. - Non fu, par foi!
Mes c'est fantosme que je voi,
Car je sai qu'il n'a mie .I. mois
Que Noël fu; si ert ainçois
Avril, que li rossignous chant.
Je n'ai pas dote qu'il m'enchant.
Par mon chief! je croi mieuz encore
Page170
L'iver d'orainz que l'esté d'orc.
Je vi les nois et sai sanz dote
Que par les nois ting je la rote
Dou chevalier que je sivoie.
Deus, ou est il? Or le voudroie
Trover! Ja mes nel troverai ! -
Quel part vet il? Quel la ferai?
Il n'est pas loing!" Lors vet au tref.
De plain eslés, non pas soëf
Se fiert dedenzm mes il n'i voit
Home de char; pas n'i estoit
L'Outredotez. - Ou estoit il? -
Orainz s'en parti come cil
Qui ert anuiiez de guetier
Au tref et est alez cerchier
El bois savoir s'il troveroit
Meslee que mout desirroit,
Et mout est liez quant puet mal fere.
Mes ou qu'il aut, toz jorz repere,
folio122c
Au paveillon sempres vendra.
Meraugis, quant il ne trova
Nul home el tref, s'en est partiz.
Toz desvez et toz esbahiz
S'en vet poignant tote une voie
Si com la rage le convoie,
S'a tant coru que il trova
.I. carrefor, la s'arresta
Page171
Et vit .IIII. homes qui boissoient
Une croiz et mout se hastoient
De boissier la, puis l'ont dreciee.
Cil dit qui voit la croiz boissiee:
"Deus, que voi je? Ou ai esté? -
Ou? El chastel ou j'ai chanté
A la tresche; li rossignous
Me disoit voir, j'estoie fous
Oui de son chant le mescreoie.
Je voi Pasques, et que diroie?
Bien m'a li dëables d'enfer
En poi de tens geté d'iver."
Lors se demente et plaint s'amie
Et dit: "Je ne me merveil mie,
Douce amie, se je vos ai
Perdue; car je vos lessai
Come fous, si sai bien sanz faille,
Quant vos veïstes la bataille,
Que vos i cuidastes ma mort.
Or n'i voi gié mes nul confort
En vos trover; trop ai lonc tens
Carolé!" Einsi fors dou sens
S'en part d'iluec, mes tel dueil a
Pres qu'il n'enrage. Tant ala
Qu'il encontra en une lande
L'Outredoté qui ne demande
Page172
De lui se la meslee non.
De Meraugis conut le non
Tantost com il vit son escu;
Car Laquis, quant il l'ot vaincu,
Li devisa queus il estoit.
Si tost com Meraugis revoit
Le roge cscu au serpent noir,
Si dit: "Je ne quier plus savoir:
Je voi la celui qui Laquis
Honi por moi; ja en iert pris 
Li droiz. Je n'en prendroie mie
Concorde." A l'encontrer i crie:
folio122d
"Cuverz, assez avez alé!
Voire, quant je t'ai encontré,
Ja n'iras plus, c'est sanz merci,
Ainz t'avrai mort. Quant je t'ai ci
Trové, ja plus ne te querrai."
Dit Meraugis: "Ja en verrai,
Dou quel que soit, morir l'orgueil.
Tu demandes ce que je vueil:
La bataille est mout bien seant.
S'ele te plest, je la vueil tant
Qu'onques de riens si liez ne fui."
L'Outredotez respont: "Je sui
Plus liez qu'onques ne fui nul lieu.
Ja concorde, ce veu a Dieu,
N'iert ja por chose qui aviegne;
Car il m'est tart que je te tiegne."
Page173
Lors n'i ot plus, le parler lessent, 
Lor chevaus hurtent, si s'eslessent
Fier et hardi plus que lieparz.
Des fers, des lances et des darz
S'entrefierent si que il font
Escuz croissir; li hauberc sont
Par force rot si que les fers
Boivent es piz; trestoz envers
S'entreportent li dui vassal.
Quant il cheïrent, li cheval
S'en fuïrent plus tost que foudre.
Cil qui remestrent en la poudre
Sont mout blecié. L'Outredotez
Fu par mi les destres costez
Feruz au cheoir en l'erbu.
Bien en garra. Meraugis fu
Feruz el piz soz la mamele
Si en parfont que l'alemele
Dou glaive en seigna par derriere
De lui. Ne sai en quel maniere
II en garisse; trop seroit
Forz a garir, mes orendroit
Ne le sent il, ne cil nel set,
Ne cist ne cil por mal qu'il ait
Ne s'esmaient, en piez revienent.
Les escuz qui mout lor avienent
Page174
Metent avant; espees tretes
S'entrevont et gietent retretes,
Sormontees et entredeus
Que nus ne peüst entr'eus .II.
Veoir fors les espees nues
Oui vont et vienent vers les nues
Et mout sont cleres et trenchanz.
Et il fierent uns cous si granz
folio123a
Que trestoz as premerains cous
Font des heaumes croissir les clous
Si qu'il descerclent et peçoient.
Li haubere que por forz, tenoient
Ne valent rien, tuit sont desrot.
As espees qui trenchent tot
Font des testes le sanc saillir.
Tot coup a coup sanz riens faillir
S'entrevienent si aïré:
"Tu m'as feru, je te ferré!"
Ne sai li queus le fist noauz;
Mes ainz que fausist li assauz
Qui premerains fu comenciez,
Ot dis plaies li mains bleciez,
Dont uns autre fust affolez.
Encor ne s'est nus reposez,
N'il ne font pas grant demoree.
Sempres revont a la meslee:
Page175
Recomencent, de chaut en chaut
La deduient, au tierz assaut
S'entresont mout entrempirié.
Par tantes foiz sont reperié
A la meslee que il sont
Près de la mort, mes il n'i ont
Assez, ainçois en vuelent plus.
Lors dit l'Outredotez: "Mar fus,
Bataille! tu es la meillor
Qui onques fust ja mes nul jor
Par .II. homes, tel ne sera."
Dit Meraugis qui l'escouta:
"Por quoi mar fus?" - "Qu'ele est perdue.
Ja par nos n'iert avant seüe." -
"Por quoi?" - "Je conois bien et voi 
Que tu m'as ocis et je toi.
Si est domages, car tu es
Li plus hardiz qui onques mes
M'encontrast. S'en ai encontrez
Assez, mes nes ai pas contez,
Et mout en ai et morz et pris.
Mes sor toz je t'en doing le pris;
Car tu es li plus merveilleus.
Ne t'en fai pas plus orgueilleus
Se je te pris; ja por cest los
Ne te cherra some de dos
Page176
folio123b
Que tu ne muires sanz respit."
"Avoi!" fet Meraugis qui dit:
"Bien sai que mautalenz et ire
Te fet ceste parole dire.
Certes, bien croi que je morrai;
Mes ja tant come je durrai
Ne me tendras por recreant.
De ce que tu me prises tant
Dis tu t'onor, et je pris toi
Plus; n'il n'iert pas tel dueil de moi
Come de toi, se je muir, non!
Car je ne sui de nul renon,
Mes tu es li plus renomez.
Sol dou non dont tu es nomez
Puet l'en mout grant paor avoir;
Car tes nons fet a toz savoir
Que l'en te doit outredoter.
Ce ne fet pas a redoter
Que mainz chevaliers ne te dot:
Et je meïsmes te redot
Plus qu'onques mes ne dotai home.
C'est li nons qui plus droit se nome
Que li tuens. Mes se ci estoit
Li rois Artus, il ne porroit
Nos acorder ne metre pes.
J'ai a Laquis de Lampagrés
Promis la main dont tu crevas
Son oeil. Ou tu la me leras
La main, ou je lerai la vie."
Page177
"Est ce ce dont tu as envie,
Meraugis?" - "Oïl!" - "Tu es fous;
Que de la main prendras les cous
Dont tu morras. Trop avon ci
Esté en pes, je te renvi
Au gieu ou nos metron chascun
Tot contre tot, tot iert a un."
Ne dirent plus; eneslepas,
Espees tretes, a granz pas
S'entrevienent, mes il ne fierent
Fors es plaies qui es cors ierent,
Que li hauberc sont desmaillié;
Tant ont desus les cors maillié
Des espees qui vont et vienent.
Merveille est com les ames tienent
Es cors, qu'eles ne saillent fors;
Qu'il n'i a nul qui n'ait el cors
folio123c
.X. plaies; par mi la menor
Porroit une ame sanz demor
Issir s'en, les eles tendues.
Mout se sont les ames tenues
Et tant se tienent que de sans
Lessent tant qu'il perdent le sens
Et lor force; que li plus forz
N'a tant pooir por nul esforz
Qu'il puisse s'espee tenir,
Page178
Non pas tant d'escu sostenir
Com il ont, ainz les ont lessiez.
Des braz se sont entrembraciez
Par les testes; ilueques sont
Entrapoiié que riens ne font,
Riens ne dïent, ne il n'i a
Celui des .II. qui .I. esta
Feïst par soi, qu'il ne porroit;
Que se cist n'estoit, cil cherroit.
Einsi ont une piece esté	
Tant qu'en la fin l'Outredoté
Morut, si chieent ambedui,
Meraugis sus et cil soz lui;
Qu'il n'a pooir de fere plus.
Un poi s'escrie au cheoir jus
Meraugis qui encor n'est mie
Morz; lors li menbre de s'amie
Et de la main que il promist
A Laquis. En cel porpens prist
Force et vigor, si s'est dreciez
Par force et tant s'est esforciez
Qu'il a pris une espee et voit
L'Outredoté qui se gisoit
Tot envers, les paumes tendues.
Meraugis drece vers les nues
L'espee et fiert desus le poing
Contre terre; .II. piez en loing
Page179
Vole la main, et il la prent.
Quant il la tient, tot erraument
Sospire; en cel sospir qu'il fet
Li faut la force et il s'en vet
En mi la lande toz envers.
Desus son piz tint en travers
As .II. braz la main embraciee
Au chevalier el l'a laciee
Contre son piz par tel pooir
Que bien pert qu'il la veut avoir.
folio123d
Einsi en mi lande jurent
Li chevalier et tant i furent
Que par iluec vint une rote
De chevaliers. La estoit tote
La force Meliant de Liz;
.I. chevaliers preuz et hardiz
Les conduit, serorges estoit
Belchis le Lois qui li avoit
Mandé qu'a Pasques fust a lui.
Cil qui nel lesse por nului
I vient; ensemble o lui venoit
Espinogrés ses nies qui doit
Lidoine prendre et estre rois.
Mes li vaslez sera ainçois
Chevaliers que l'en la li doigne.
A Pentecoste sanz aloigne
Sera chevaliers a Monhaut.
Page180
Tant ont erré qu'en mi le gaut
Truevent les chevaliers gisant
Oui combatu s'estoient tant
Ensemble qu'assez en avoient.
Cil de la rote qui les voient
Vont cele part, si s'arresterent
Sor eus et tant les esgarderent
Qu'il conurent l'Outrecoté.
Mes il ne sevent verité,
Qui cil est qui ocis l'avoit,
Ainz dïent tuit: "Deus, qui estoit
Cil qui fu tant bons chevaliers?"
Dit Melianz de Liz li fiers:
"Qu’est ce?"  - "Sire, cist est ocis
Qui ert dotez en toz païs." -
"L'Outredotez?" - "Voire, sanz faille,
Onques mes ne fu tel bataille
Que cist est morz!" - "Qui l'a ocis?" -
 "Ne sai li queus en a le pris,
Mes chascuns a sa mort vengiee."
"Cil qui li a la main trenchiee,"
Fet il, "en a le pris par droit."
"Ice qu'il la tient si estroit
Contre son piz, que senefie?
Bien pert qu'il ne la lessast mie
El champ s'il eüst le cuer sain."
"Que que soit li forfist la main,
Seignor," fet Melianz de Liz.
Page181
Lors descent la bele Odeliz,
Une dame qui ert amie
Meliant de Liz, mes n'ert mie
Vilaine, ainz ert preuz et cortoise.
A Meraugis, dont mout li poise,
Mist sa main blanche sor le piz
Et taste s'il ert refroidiz.
Nenil, ainz sent qu'encor estoit
Chauz et qu'encore li batoit
Li cuers qui fu de grant esforz.
"Deus", fet ele, "cist n'est pas morz,
Li cuers li bat et jel sent chaut.
De l'Outredoté ne me chaut
Se Deus en a le mont vengié.
Cil qui li a le braz trenchié
Est de grant cuer. Se jel pooie
Garir, .I. present en feroie
A Belchis, si li ederoit
Contre Gorvain; nus n'oseroit
Proece a la soie ajoster.
Se il ja mes pooit joster
De lance, grant joie en avroie"
Dit Melianz: "Mout en seroie
Liez s'il tornoit a garison.
Un lit ou nos l'en porteron
Nos covient fere." Sempres vont
Cueillir .II. perches dont il font
Le lit si bel qu'onques nus plus.
Page182
Muguet i ot, et par desus
Jonchent violete novele.
Li vaslez et la damoisele
Desarmerent le chevalier;
Mes el point qu'il senti sachier
La main que cele li osta,
Ovri les ieuz, si l'esgarda
Mout fierement, et en poi d'ore
Li retorna li blans desore.
Un plaint giete, si s'en revet.
La dame dit: "Mal avon fet
Qui li avon la main toloite."
Lors la remet ausî estroite
Sor le piz com ele ert devant.
La dame dist a son semblant
De la main: qui la li toudroit,
Tant la veut que il en morroit
De dueil. Por ce li ont remise
Desus le piz. La dame a prise
Une manche blanche et deliee
Dont ele li a essuiiee
folio124b
La chiere qui de sanc fu teinte;
Mainte plaie li a restreinte
La dame qui grant paine i met.
Sor toz les autres s'entremet
Espinogrés de lui bien fere.
Li damoiseaus de bon afere